Kawani ni Ampatuan gironda

GIRONDA sa kapulisan ang balay sa kanhi empleyado ni Autonomous Region in Muslim Mindanao (Armm) Governor Zaldy Ampatuan human nasayran nga nagbaton sila og mga armas sa alas 6:15 sa buntag kagahapon didto sa Barangay Bago Gallera, siyudad sa Davao.

Mga sakop sa Talomo Police Station maoy mitunol sa search warrant numbers 1330 ug 1331 nga gipaguwa ni Judge Isaac Robillo Jr. sa Regional Trial Court (RTC) Branch 13 sa balay ni Arturo Moreno Jr. ug Arturo Moreno Sr. didto sa Purok 9, Lower Libby Road, Barangay Bago Gallera.

Ang search warrant # 1330 alang kang Moreno Jr., 40, minyo, kanhi Liaison Officer ni Governor Ampatuan samtang ang search warrant # 1331 alang kang Moreno Sr., 75, minyo, negosyante, lumad nga taga Pikit, North Cotabato.

Nakuha sa kapulisan gikan sa balay ni Moreno Jr. ang usa ka Glock 9mm pistol GNP 976, mga magazines, 30 ka buhing bala, usa ka puloan sa M16 armalite rifle ug usa ka holster samtang nakuha sab ang duha ka .22 caliber rifle sa balay ni Moreno Sr.

Dihang gipangutana kung ang pagronda sa ilang balay may kalabutan sa kaso sa mga Ampatuan, si Moreno Sr. nagsulti nga nadamay lang sila sanglit wala silay kalambigitan sa pamilyang Ampatuan.

"Wala mi labot. Ang akong anak igo lang nangempleyo sa mga Ampatuans kaniadto," suma ni Moreno Sr. sa mga tigbalita didto sa buhatan sa Investigation and Detection Management Branch (IDMB) sa Davao City Police Office (DCPO).

Ang asawa ni Moreno Jr. nagbutyag sab nga wala silay labot sa mga Ampatuan sanglit dili na sila konektado karon ug yano na lamang silang negosyante.

"Honestly speaking, I worked with Governor Zaldy Ampatuan as Executive Assistant while my husband worked as Liason Officer from October 2006 to November 2009. My husband was assigned in Metro Manila. Wala na mi nagtrabaho kay wala na ma-renew ang among contract," suma ni Donna Moreno, 24, asawa ni Moreno Jr.

Si Donna nangatarungan nga nagbaton sila og armas isip proteksiyon sa ilang kaugalingon apan legal ang paghupot sa maong armas.

"Hinihintay ko nalang na mai-fax ngayon ang mga documents kasi nasa husband ko ang license to carry firearms. At hinihintay ko rin ang aming lawyer," dason ni Donna sa Superbalita.

Sa pagsuwat ning balita, giandam na sa kapulisan ang kasong illegal possession of firearms aron didto na sa korte ipakita ang legal nga mga dokumento.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph