MOKABAT ngadto sa P40 mil ang nawala sa usa ka negusyanti human gitulis niadtong Huwebes sa buntag sa Barangay San Martin lungsod sa Villanueva, Misamis Oriental.
Nitaho sa Villanueva Police Station ang biktima nga mao si Virgilio Yacuma, taga lungsod sa Claveria, Misamis Oriental.
Si SPO2 Salvador Dalura, imbesitgador sa kaso nibutyag sa Sun.Star Superbalita nga nahitabo ang pagpanulis dihang patugbong paingon sa lungsod sa Tagoloan ang biktima sakay sa kaugalingong motorsiklo.
Nabantayan niini nga adunay duha ka mga suspetsado nga sakay sab sa laing motorsiklo ang nagsunod kaniya ug paghidangat sa San Martin sa mingaw nga dapit kalit lang nga giatangan ang dalan ug gibabagan dayon gitionan og kalibre .45 ang biktima.
Nideklarar og tulis ang mga suspetsado ug tungod sa kahadlok sa biktima nga pusilon, gihatag niini ang kwarta nga dala nagbalor og P40 mil.
Human nakuha ang tinguha dali nga misibat ang suspetsado sakay pag-usab sa motorsiklo nga nakuhaan lamang ug plate number nga 138 nga numero ug letrang B, gawas sa maong identification wala nay lain.
Matud ni Dalura nga negosyo ni Yacuma mao ang pagpamalit og mga binuhing baka. Posibleng gisundan na kini dihang anaa pa ang biktima sa Claveria ug nahibaw-an nga aduna kini kanunay dala nga kwarta.
Nagtuo ang kapolisan nga posibleng ang mga suspetsado adunay grupo tungod kay daghan man sa mga biktima sa tulis ang natigayong sa boundary nga bahin sa Claveria ug Villanueva.
Hinuon, ang maong grupo padayong gimonitor sa kapolisan aron masapon ug masikop.