KALIT nga nabuhi ang liboan nga nagdasok sa Mandaue Sports Center dihang naabot si Davao Mayor Inday Sara Duterte-Carpio alang sa pag-formalize sa panag-alyansa sa Hugpong ng Pagbabago (HnP) ug Hugpong Mandauehanon Pagbabago (HMP).
Nakaingon ko nga dunay lahi nga charisma si Inday Sara nga nakapadani sa katawhan kaniya. Tungod ba kini kay anak siya sa usa ka popular nga Presidente Rodrigo Duterte? Sa ako tan-aw, duna sab gyud siyay lahi nga kalidad.
Ang pangutana lang kon ang maong charisma makatakod ba sa iyang mga kaalyado. Sa miaging piliay man gud, walay mga kandidato alang sa pagka senador si Digong nga nakadaog.
Dinhi sa Syudad sa Sugbo, lanog nga gibandera ni Barangay Kapitan Niña Mabatid ang suporta ni Presidente Duterte sa iyang tinguha nga mahimong chairman sa Association of Barangay Councils (ABC) sa Syudad sa Sugbo.
Mobalik ko sa pangutana, lahi ba ang charisma sa anak nga si Sara?
Pananglitan, ang maong charisma makatabang ba kang Mayor Luigi Quisumbing? Kini atong makita sa ngadto-ngadto kon makatabang ba ang alyansa sa nilang Sara ug Quisumbing alang sa kandidatura sa mayor sa Syudad sa Mandaue.
Sa pagkakaron, si Mayor Quisumbing mao ang kandidato sa Hugpong ng Pagbabago samtang ang iyang kaatbang mao si Kong. Jonas Cortes nga maoy kandidato sa PDP-Laban.
Ang maong charisma makatabang ba kang Bise Gobernador Agnes Magpale nga maoy kaalyado sa Hugpong dinhi sa Sugbo batok sa kandidato sa PDP-Laban nga si Cong. Gwen Garcia.
Ang maong charisma makatabang ba sab sa uban nilang mga kaalyado nga modagan sa pagka senador sama kang kanhi PNP Chief Bato dela Rosa, Sec. Harry Roque, ug Cong. Sajid Mangungundato?
Liloan
Makaingon ko nga strategic ang nahitabong sister city agreement sa Syudad sa Davao ug lungsod sa Liloan nga gipirmahan nilang Mayor Sara ug Mayor Christina Garcia-Frasco.
Una, makagaan kini sa kabug-aton sa alyansa sa Hugpong ug sa Bakud nga nipabor kang Bise Gobernador Agnes Magpale.
Ikaduha, dili lisod nga maka-connect sa Hugpong inig human sa Mayo 2019. Nakahibawo na man kita nga dili maayo ang relasyon sa liderato sa Hugpong ug sa PDP-Laban didto sa Davao ug kini naabot didto sa dakong hawanan sa Kongreso.
Ato lang nabantayan nga sa pagbisita ni Inday Sara kagahapon dinhi sa Sugbo labi na sa pag-abot niini sa Mandaue Sports Center, wala makakuyog si Presidential Assistant Mike Dino. Tungod ba kini kay si Dino mas napunting nga nidapig sa PDP-Laban ug sa kampo ni Cong. Jonas Cortes?
Ang ako lang kay murag wala magpahigot sa Davao si Inday Sara.
(@anol_cebu sa Twitter)