DYNASTY. Si President Duterte di gusto og dinastiya. Apan, matod pa sa Presidente, tungod sa sitwasyon sa dakbayan sa Davao di mapugngan nga mokandidato ang iyang mga anak nga si Davao City Mayor Sarah Duterte-Carpio, nga magpasubli; si Basti pagka bise mayor ug si Polong pagka kongresista.
Ang buot ipasabot ni Presidente Duterte nga natarong ang kaniadto gubot nga dakbayan sa Davao tungod sa iyang pagduma nga gisunod sa iyang anak nga si Mayor Inday Sarah.
Gani, giimbitar ni Presidente Duterte ang mga kritiko sa pag-adto sa Davao aron ilang makita ang kalinaw ug dakong paglambo niini ubos sa ilang pagdumala.
Naa sa atong 1987 nga Batakang Balaod nga gidili na ang political dynasty.
Apan wala pay balaod nga gipasar ang Kongreso aron maipatuman ning pagdili sa political dynasty. Bisan og unsaon di gyud mahitabo nga ang mga kongresista mopasar sa maong balaodnon kay sila ang una nga maigo.
Apan kon kining mga sakop sa usa ka pamilya nga nangandidato ang pasultion dili man dinastiya tungod kay pilion pa man sila sa mga botante.
Ang dinastiya sama sa panggamhanan sa usa ka gingharian nga ang mga opisyales mga tinudlo sa hari ug dili pinili sa katawhan.
Sa maong sitwasyon ato na lang itugyan sa atong mabuot nga mga botante ang pagdesidir kinsay mga kandidato nga angayan botohon ug molingkod sa panggamhanan nga moserbisyo sa katawhan ug dili maoy serbisyohan. Naa pa kaha karon ning klase sa politiko nga atong gihulagway?
Kining pulitika sa ato morag sakit nga allergy motakar atol sa dautan nga panahon. Komedya pa sa akong amigo nga mokatol ang lapa-lapa sa mga pulitiko ig-abot sa panahon sa eleksyon.
Tan-awa sila si Toledo City Mayor Sonny Osmeña, Talisay City Mayor Eddie Gullas, kanhi Senador Juan Ponce Enrile ug uban pa nga bisan sa kadako na sa ilang edad modagan lang gihapon.
Si Mayor Sonny Osmeña modagan pagka kongresista didto kuarto distrito ug si Mayor Eddie Gullas modagan pagka kongresista sa primero distrito.
Si Enrile, nga gipagawas sa Korte Suprema sa prisohan tungod sa giingon nga di na maayo ang iyang panglawas tungod sa iyang edad, modagan pagka senador.
Sa tinuoray, walay balaod nga nagdili sa usa ka tawo nga mokandidato bisan kon super senior citizen na siya.
Kahibawo ko nga naay mga edaran nga mas lantip pa og panghunahuna kay sa mga batan-on nga way lingaw. Hinuon, ang pagserbisyo sa katawhan di man daugon sa estorya kon di sa agi.