BISAN sa hukom sa Court of Appeals (CA) nga nagpabalik kaniya sa City Council, dili pa motambong sa regular session si James Anthony Cuenco, usa ka tuig human siya gitaktak sa serbisyo sa Office of the Ombudsman Visayas.
Gihangop sa pamilyang Cuenco ang hukom sa CA nga nagpakawaysala ni James sa kasong administratiba, diin gibasura usab sa Sandiganbayan ang kasong kriminal nga gipasaka batok kaniya.
Si James maoy chief of staff niadtong tuig 2001 sa iyang amahan nga si kanhi kongresista Antonio Cuenco kansang kaso nagagikan dihang ilang gipatuman ang programang Tony ‘N Tommy nga maghatag og libreng tambal ngadto sa mga residente sa south district nga malandig sa Vicente Sotto Memorial Medical Center (VSMMC).
“We welcome the total exoneration on the merits by the CA in the case filed against James Cuenco, the Cuenco family wishes to thank the good Lord for the vindication that we received from His blessings,” matod pa sa kanhi kongresista.
Si Bise Mayor Edgardo Labella nagkanayon nga ilang sundon ang kamanduan sa CA apan nibutyag nga maghuwat sa pa sila sa direktiba gikan sa DILG.
“Let us follow the directive issued as incorporated in the decision exonerating Councilor James Cuenco to order the DILG to reinstate to his position as councilor of south district in the City of Cebu,” padayag ni Labella.
Ang amahan ni James nga si Tony niingon nga ang mastermind sa paggamagama sa resibo ug pagsunod sa pirma aron masingil ang P3.3 milyones nga salapi binuhatan sa tag-iya og pharmacy nga karon iyang giingong tuana sa gawas sa nasod.
Samtang, dili magmakuli sa pagbiya sa iyang katungdanan si Konsehal Erik Espina ug itugyan kini og balik kang Cuenco
“Nalipay lang ko and that’s a vindication for Councilor James Cuenco, that clears the air of any suspicion,” matod ni Espina, kinsa gitudlo sa posisyon niadtong Hulyo ning tuiga. PAC