SUKWAHI sa unang gitakataho, ang anak ni Presidente Rodrigo Duterte ug Davao City Mayor Sara Duterte-Carpio nibutyag nga walay alyansa sa iyang Hugpong ng Pagbabago (HNP) tali sa Bakud party sa mga Durano sa dakbayan sa Danao atol sa iyang pagbisita sa Sugbo kagahapon.
“Wala ma’y alliance ang Bakud ug ang HNP,” matod ni Duterte-Carpio.
Siya nibisita sa lungsod sa Liloan aron paglagda sa sisterhood agreement tali ni Liloan Mayor Christina Frasco ug pormal nga paglagda sa pakig-alyansa HNP ug ang Hugpong Mandauehanon sa Pagbabago (HMP) ni Mandaue City Mayor Luigi Quisumbing sa samang adlaw.
Mibalik-lantaw
Sa iyang pamahayag sa Liloan, si Duterte-Carpio nibalik-lantaw sa kasinatian sa iyang apohan, kanhi Davao governor Vicente Duterte niadtong 1950s sa Danao, ug kon nganong ang ilang pamilya naabot sa Davao.
Matod ni Sara, ang mga Durano nisuway sa pagkutlo sa kinabuhi sa iyang apohan nga kanhi mayor sa Danao. Mao kini hinungdan nga nilalin ang iyang apohan uban sa pamilya sa Davao.
Nakahinumdom usab sa iyang kaugalingong kasinatian sa 2016 presidential elections, si Duterte-Carpio niingon nga nibisita siya sa fifth district sa Cebu, apan duha lang ka grupo ang ning-abi-abi kaniya, usa niini si kanhi Liloan Mayor karon Cebu Ports Authority Commissioner Vincent Franco “Duke” Frasco uban sa iyang asawa, Liloan Mayor Christina Frasco; ug ubang mga iyaan ni Duterte-Carpio nga sila si Elleanor Duterte sa Danao City.
Nagpasalamat si Duterte-Carpio kang Mayor Frasco ug Commissioner Frasco sa paghangop kaniya ug pagsuporta sa kandidatura sa iyang amahan nga si Presidente Duterte. Ang Liloan nihatag og dakong botos ni Presidente Duterte sa fifth district sa Cebu.
Si Duterte-Carpio dayag nga nikampanya sa kandidatura ni Commissioner Frasco nganikandidato sa pagka kongresista fifth district batok sa kasamtangang Congressman Red Durano.
Nagkanayon si Duterte-Carpio nga dili gusto manghilabot sa pulitika sa Sugbo apan nidason nga mosuporta sa mga kandidato nga nagsupora sa iyang amahan, sama sa mga kandidato sa PDP-Laban diin si Congresswoman Gwen Garcia maoy standard bearer sa pagka gobernador sa Sugbo.
HNP-HMP Alliance
Panag-alyansa sa Hugpong ng Pagbabago (HNP) ni Duterte-Carpio ug sa Hugpong Mandauehanon sa Pagbabago (HMP) ni Mandaue City Mayor Luigi Quisumbing, nahingpit na kagahapon.
Gawas sa signing sa alliance agreement, gihimo ang mass oath taking sa mga sakop sa HMP ngadto sa regional party ni Sara.
Daan na nga gitug-an ni Quisumbing nga gawas sa ilang tibuok slate, uban sila Bise Mayor Carlo Fortuna ug ilang mga konsehal alang sa sunod tuig nga piniliay sa dakbayan sa Mandaue, lakip sa anaa ang ubang mga sakop sa HMP ug mga representante sa 27 ka mga barangay, alang nausab sa gihimong mass oathtaking.
Si Marvin Soco, pangulo sa HMP, sa iyang mensahe nitug-an nga gituyo ang pagtukod nila sa HMP, pagpakita nga maghugpong ang Mandauehanon alang sa padayon ug dugang kalambuan sa syudad, nga tanan ang molihuk ug tanan ang makabenepisyo.
Sukad pa lang alas 10 kagahapon sa buntag gisugdan ang mga programa diha sa Mandaue City Sports Complex, diin lakip sa nitambong ang mga buot magpapili pagka-senador nga sila si kanhi Presidential spokesperson Harry Roque ug kanhi PNP chief ‘Bato’ dela Rosa.
Kini pagpakita usab og suporta kang Presidente Duterte tungod sa pagsuporta sa mga Mandauehanon dihang nitambong ang Presidente sa miaging Charter Day sa Mandaue niadtong Agusto, diin unang higayon nga adunay presidente sa nasud nga nisalmot sa kasaysayan sa Mandaue.
Gilantawan nga dugang proyekto ug programa ang mabubo sa siyudad human nga inisyal nga housing project nga ipatindog sa Barangay Looc. SunStar Cebu, FMDD - Correspondent