NAKAHINUMDOM ba kamo sa pagpabanhig sa Barangay Kalunasan, dakbayan sa Sugbo niadtong Septiyembre 13 ning tuiga, diin tulo ang patay? Duha ka jail guards sa Cebu Provincial Detention and Rehabilitation Center (CPDRC) ug usa ka high-value target inmate nga mopadung unta sa husay sa korte sa kasong druga.
Gihulagway sa direktor sa Cebu City Police Office (CCPO), Sr. Supt. Royina Garma, nga sulbad na ang maong kaso sa pagbanhig sa sakyanan sa CPDRC nga niresulta sa kamatayon sa prison guards nga silang Bernie Bayutas ug Joel Teves lakip na si Jerryfer Perigrino nga giila nga high value inmate.
Kini human nailhan na ang duha sa upat ka mga armadong lalake nga responsable sa maong pagpamanhig. Giingong hitmen kini sa bigtime drug lord nga naa sa CPDRC.
Ang duha nga nailhan nga suspek dili lang una panganlan ni Garma samtang dili pa mogawas ang warrant of arrest batok kanila.
Sa imbestigasyon, ang positibong pag-ila sa saksi sa duha ka mga suspek mao ang nagkutay nabilanggong drug lord nga si Alvaro “Barok” Alvaro, taga dakbayan sa Danao, nga utok sa maong pagpabanhig.
Si Barok nitahan sa National Bureau of Investigation (NBI) agents sa Bohol human sa lima ka adlaw sa pagbanhig-patay ni Jeffrey “Jaguar” Diaz, taga Duljo Fatima, dakbayan sa Sugbo, giila niadto nga number one drug lord sa Central Visayas, didto sa Las Piñas City niadtong Hunyo 17, 2016.
Si Barok gidudahang kakunsabo ni Jaguar.
Dugang sa imbestigasyon, ang hitmen giingong gisugo nga likidahon si Perigrino lakip na ang usa sa mga prison guard nga nalambigit usab sa palusot sa ilegal nga drugas sa CPDRC.
Si SPO2 Winston Ybañez, lead investigator sa kaso, nagkanayon nga ang saksi maoy nihulagway sa panagway sa suspek ug sa dihang gipakita sa usa ka picture niini, positibong gitudlo nga unang nipusil sa duha ka prison guards.
Sila usab mao ang nibabag sa sakyanan samtang naglugsong sa dalan sa Kalunasan mipusil pag-una sa drayber hangtod nga nabangga kini sa duha ka motorsiklo nga nag-park sa kilid sa karsada.
Sa pagkadusmo na sa sakyanan sa punoan sa kahoy, ang unang gunman nikanaog sa motorsiklo ug mikuha sa iyang dala nga armalite rifle nga gisulod sa sako ug gipamusil na ang duha ka prison guard nga silang Teves ug Bayutas.
Ang ikaduhang motorsiklo nga gisakyan sa laing gunman mao usab ang niduol sa luyong bahin sa van sa CPDRC ug gipusil si Perigrino.
Aduna na silay hulagway sa duha ka mga suspek, diin ang usa niini, kadugo ni Barok nga maoy iyang gihimong hit man.
Dugang ni Ybañez, ang motibo sa pagbanhig kanila ang kasuko sa drug lord kang Perigrino ug sa usa sa mga prison guard nga gitumbok nga adunay ilegal nga binuhatan sa CPDRC nga gipaubos na kaniadto sa imbestigasyon.
Dugang niya, naangin lang ang laing usa ka guard nga uban sa sakyanan.