Panawagan sa Cesafi

DI na lang unya ta matingala nga mahitabo pag-usab ang nahitabo niadtong pipila na ka tuig ang milabay nga ang finals sa Cebu Schools Athletic Foundation, Inc. (Cesafi) men’s basketball mogamit og blackboard nga maoy himuong scoreboard, ug ang oras permi na lang i-anunsyo sa barker.

Kini tungod kay hangtod karon ang atong mga kadagkuan sa Cesafi, pinangulohan ni commissioner Felix Tiukinhuy, wa gihapon diay makapalit og kaugalingon nga electronic ug portable nga scoreboard nga por enkaso og dunay kakulian o electrical trouble, adunay reserba nga magamit.

Sa semifinals gud niadtong Sabado, kon ang editor pa sa The Freeman nga si Manny Villaruel ang pasulti-on, ka pito gyud kuno ka higayon ma-reset lang og kalit ang electronic scoreboard.

Sa duwa sa UV Lancers ug sa UC Webmasters, nitumaw ang panaglalis tali sa matag habig sa krusyal nga mga minutos tungod kay nibalik na usab sa sero ang score oras unya sikit kaayo ang duwa.

Dunay mi-insister nga 4:02 na lang ang nahabilin sa oras samtang duna usay miingon nga 4:32 segundos. Tungod niini, nagpangutana pa ang mga referees ug table officials niadtong nakakuha og video aron pagtino sa nahabiling oras atol sa kalit nga pagkaguba sa scoreboard.

Tuod man, gituman ang 4:32 nga oras kay mao may ilang nahagdaw nga kasayuran.

Pero ang kasaligang tinubdan nga mismo maoy nakakuha og video miingon nga 4:02 na lang gyud diay to, sukwahi ug nasipyat siya sa iyang gitug-an.

Pastilan. Simbako og mahitabo ni niining championship games tali sa defending champion UV Lancers ug USJ-R Jaguars unya maoy makapausab sa dagan ug resulta sa duwa, dili kaha moulbo ang kagubot?

Hinaot nga kahatagan unta ni nila og aksiyon ug saktong preparasyon aron malikayan ang kontrobersiya. Kining atoa constructive criticism lang ni nga makatampog gamayng kaayohan sa lega. Karon na ra bang Huwebes ang Game One sa collegiate division.

Pero ambot og maaksiyonan ba sab kaha ni dayon ilabi na kay wala ra bay commissioner niadtong higayona?

(junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph