TUNGOD sa dalaygon niyang gipakita sa miaging duha ka mga duwa sa Alaska Aces sa Philippine Basketball Association (PBA) Governor’s Cup , napili si Chris Banchero isip bag-ong PBA Press Corps Player of the Week awardee.
Si Banchero maoy mibida sa duha ka sunodsunod nga kadaugan sa Aces batok sa Columbian Dyip, 104-94, ug Blackwater Elite, 116-109, nga nakahatag kanila og bahin sa liderato dala ang 7-2 nga rekord.
Kauban sa Aces sa paggunit sa liderato mao ang Brgy. Ginebra Gin Kings ug Magnolia Hotshots.
Ang 29 anyos nga pointguard nag-average og 19 puntos, pito ka assists ug 5.5 rebounds sa nahisgutang duha ka sunodsunod nga kadaugan sa Aces.
Ang fifth overall pick sa Aces niadtong 2014 hapit naka-triple double sa kadaugan sa Aces batok sa Dyip diin mirehistro kini og 10 puntos, 11 assists ug pito ka rebounds.
Unya sa kadaugan sa Aces batok sa Elite, nagbangis sa opensa si Banchero ug mipakatap kini’g bag-ong career-high nga 28 puntos sa 12-of-16 shooting.
Si Banchero, kinsa usa ka Fil-Italian, milupig sa Fil-American players sa Meralco Bolts nga sila si Cliff Hodge ug Chris Newsome lakip na sa No.1 rookie nga si Christian Standhardinger sa San Miguel Beermen sa inilugay sa POW award. ESL