GIPANGSUSPENSO sila si Brandon Ingram, Rajon Rondo sa Los Angeles Lakers, ug Chris Paul sa Houston Rockets tungod sa ilang kalambigitan sa karambola sulod sa korte atol sa ilang duwa niadtong Dominggo.
Ang NBA mipagawas sa ilang mga silot kagahapon, usa ka adlaw human sa insidente nga nahitabo sa fourth quarter didto sa Staples Center.
Si Ingram silotan og upat ka duwa nga way suweldo, kang Rondo tulo samtang duha kang Paul nga gisugdan kagahapon sa dihang ang Rockets nakigsangka sa Los Angeles Clippers.
Karong adlawa, sugdan na usab ang pagkasuspenso ni Ingram ug Rondo diin ang Lakers mo-host nausab sa San Antonio Spurs.
Apan ang gikasurprisa sa kadaghanan mao ang pagpamulta sa tulo diin si Paul maoy nahan-okan sa pinakadakog mabayran.
Moabot ngadto sa dul-an $491,782 ang multa ni Paul kinsa mao karon presidente sa NBA Players’ Association.
Si Rondo pabayron usab og $186,207 ug $158,816 kang Ingrams.
Wa kauyon si Houston coach Mike D’Antoni sa kadako sa bayranan ni Paul.
“It’s just not equitable,” nagkanayon si D’Antoni. “If you wanted to suspend him one (game) I get it, just to make a statement. Then you’re talking monetarily, he’s paying three times more than the other guys are paying for missing games? That doesn’t seem to be right.”
Gipasabot ni D’Antoni nga unsa na man lang diay ang buhaton ni Paul human siya lud-i ug sumbaga ang iyang nawong ni Rondo. Mabarog ba lang diay siya? JBM