NASUGAMAK sa ilang unang kapildihan ang defending champion Golden State Warriors human kini miyukbo sa host Denver Nuggets, 100-98, kagahapon sa bag-ong gisugdan nga National Basketball Association (NBA).
Si Gary Harris mipakatap og 28 puntos alang sa Nuggets kinsa, taliwala sa ilang 18 ka sipyat sa free throws - unom niini sa final quarter, misaka ngadto sa 3-0 nga baraha, nga maoy pinakamaayong pagsugod sa ilang kampanya sukad niadtong 2009-10 diin sila naka 5-0.
Maayong nakaabag sa Nuggets si Nikola Jokic nga sa ikaduhang higayon naka-double digits pinaagi sa iyang 23 puntos, 11 ka rebounds ug unom ka assists.
Apan ang nakaluwas og dako sa maong kadaugan mao ang tapal ni Juancho Hernangomez ngadto sa bigman sa Warriors nga si Damian Jones nga mao untay makapa-overtime.
Ang triggerman sa Warriors nga si Stephen Curry kinsa mitapos sa duwa nga may 30 puntos, mipabuto og tulo ka tres sulod sa 1:11 segundos nga nahabilin aron pangulohan ang rally sa Golden State.
Si Kevin Durant nga nagsul-ob og sapatos nga yellow nga may gold sa iyang tuo samtang puti nga may blue sa wala, mitapos sa duwa nga may 20 puntos ug 11 ka rebounds.
Ang Warriors mo-host sa Phoenix karong adlawa ug sulngon ang Nuggets sa Sacramento Kings.
Sama sa Warriors, ang laing title-contender Houston Rockets nakaangkon usab sa ilang ikaduhang kapildihan sulod sa tulo ka duwa.
Ang Rockets nga mipukan sa Los Angeles Lakers, 124-115, niadtong Dominggo sa duwa nga gihamok og kagubot, gipatugpa sa Los Angeles Clippers, 115-112.
Ang reserve nga si Montrezl Harrell nangulo sa fourth quarter rally sa Clippers nga may 17 puntos aron papason ang kuwatro nga labaw sa Rockets kinsa miduwa nga wala ang ilang star player nga si Chris Paul.
Si Paul nagsugod sa pagserbisyo sa iyang duha ka duwa nga suspension tungod sa pagkalambigit niini sa kagubot nga mihugpa atol sa ilang pagpakigsangka sa Los Angeles Lakers niadtong Dominggo.
Mipusa si James Harden og 31 puntos nga may 14 ka assists sa nahagsa nga Rockets. JBM