LIBOAN ka mga Dabawenyo ang nagyawyaw sa social media labot sa gihimo nga protesta sa mga militanteng pundok niadtong Lunes dinhi sa siyudad sa Davao. Nasuko sila tungod kay natanggong ilang biyahe pasulod ug pagsawas sa dakbayan sanglit gibabagan sa mga militante ang kalsada duol sa checkpoint sa Task Force Davao sa Barangay Lasang ning siyudad.
Usa sa mga nagyawyaw ang akong suod nga higala ug kauban sa programa sa radyo nga si Aksyon Pepe Bucao nga hapit wa nakaprograma niadtong Lunes sa gabii tungod sa gihimo sa mga raliyesta.
Tungod sab sa nahitabo, nagyawyaw usab si Davao City Mayor Sara Duterte-Carpio kinsa nagkanayon nga di angay suportahan ang mga party-list groups nga gipasakopan sa mga militanteng pundok.
Daghan ang nagsulti nga sinugo sila sa mga Dilawan (kolor sa partido ni kanhi Pangulong Benigno Aquino III) aron samukon ang administrasyon ni Pangulong Rodrigo Duterte.
Kon ang mga militante ang pangutan-on, wa sila gisugo sa partido sa kanhi pangulo apan ang nagtukmod nila mao ang ilang kawsa nga ihunong ang implementasyon sa martial law sa Mindanao sanglit gatusan na ka mga kaso nga pagpangabuso ang natala sukad sa miaging tuig.
Sa nahitabo karon, alang nako, wa nay motuo sa mga militanteng pundok tungod kay sa panahon nga ilang ilusad ang lihok protesta, daghang indibiduwal ang mahasol. Mao nga inay mosuporta ang katawhan kanila, di na hinuon sila lingion.
Busa, angay kini nga lantawon sa ilang mga lider kon epektibo pa ba ang ilang istratehiya sa kasamtangan nga panahon. Ug kon di na epektibo, nan, angay silang mangita og paagi aron mosuporta kanila ang katawhan, ilabi na sa sama namong kabus sa katilingban.
Kini nga organisasyon, kung ato gyud subayon ang policy making process, gikinahanglan sila isip mga interest groups aron mahapsay pag-ayo sa mga policy makers ang ilang polisiya nga pandayon sa Senado ug Kongreso.
Kon walay presyur sa mga interest groups, labing seguro di makonsidera ang mulo sa katawhan.
Di baya nato ikalimod nga daghang mga balaod sa nasud nga napanday tungod sa presyur sa mga militanteng pundok nga napahimuslan karon sa kinabag-ang katawhan.