GIKAPUNGOT ni Davao City Mayor Sara Duterte-Carpio ang pagbarikada sa pipila ka mga militanteng pundok sa national highway sa Lasang, Bunawan District, Davao City, Lunes sa hapon, Oktubre 22.
Ang barikada gipangunahan sa Kilusang Mayo Uno (KMU) diin giingong kaubanan sa mga party-lists ubos sa Makabayan bloc sa House of Representatives nga gituohang nalakip sa Red October nga gipasiatab.
Tungod niini, mipagula og pamahayag ang mayor pinaagi sa City Information Office (CIO) nga di maayong suportahan sa eleksyon sa 2019 ang mga party-list groups ubos sa Makabayan bloc sa House of Representatives.
“They terrorize, engender lawlessness, create confusion, disrespect fellow human beings, put lives in danger, and disregard any authority altogether,” pahayag ni Mayor Sara.
Nagpahimangno ang mayor sa katawhan nga di botohan ang mga party-list groups nga iyang gibutyag, “Do not support the party-list groups under the Makabayan bloc – these are Bayan Muna, Alliance of Concerned Teachers or ACT Teachers, Anakpawis, Gabriela, Kabataan, and Migrante,” dugang sa mayor.
Mga pulis napungot sab
Sa natigayong barikada, wala sab gihimuot ang Davao City Police Office (DCPO) gumikan daghang mga gimbuhaton nga nakulgot sa dul-an usa ka oras nga pagkadelatar sa dagan sa trapiko.
Sumala ni DCPO Spokesperson Senior Inspector Ma. Theresita Plaza-Gaspan nga mokabat 300 ka mga militanteng pundok uban sa mga lumad diin dala ang ilang kabataan ang mibarikada sa tulay, pinaagi sa pagbabag usa ka sakyanan.
“Daghan kaayo ang nasuko, kay ang uban duna pay flight sa eroplano nga ginagukod unya dili sila makalusot kay gibabagan ang kalsada,” sulti ni Gaspan.
Maayo na lang kay human nagpagawas og ultimatum si DCPO director Senior Superintendent Alexander Tagum ngadto sa mga nag-ukopa sa tulay, una pa moabot ang alas 9 sa gabii, mihawa na ang mga nagprotesta sa lugar pinaagi na sab sa tabang sa mga opisyal sa barangay sa dapit.
Rally sa Freedom Park
Sa natigayong rally Martes sa mga militanteng pundok sa Freedom Park, Roxas Avenue, naa ang halos mga grupo sa party-list nga gipangbutyag ni Mayor Sara nga giingong ubos sa Makabayan bloc sa House of Representatives.
Sa bahin ni ACT Party-list representative Antonio Tinio nga walay dautan sa ilang gibuhat kung makita man sila sa mga rally sa kadalanan gumikan buot lamang nila nga tagdon sa gobyerno ang problema nga gihambin karon sa ilang mga kaubanang magtutudlo.
Pipila ka mga party-lists sa rally Martes ang wa sab mahimuot sa gibutyag ni Mayor Sara nga di sila pasuportahan sa katawhan sa eleksyon sa 2019, apan alang kang Tinio bisan pa man sa maong pahayag, daghan gihapon ang katawhan nga misalig kanila. (Uban sa taho ni Richy Nalagon)