DUHA sa upat nga mga kandidato sa pagka-mayor sa lungsod sa Cordova hayan ma-disqualify sa ilang kandidatura sa dihang adunay namatikdan sa ilang records sa Commission on Elections (Comelec).
Gikatakda nga karong Huwebes pakigtagboan sa acting election officer sa Cordova, Jovito Beltran, ang mga kandidato nga sila si Rodrigo Jumao-as ug Pablo Villaber alang sa hearing.
Matod pa ni Beltran nga samtang sila naghashas sa mga certificate of candidacy nga base sa data sa Comelec, nasuta nga sud sa duha ka higayon pakyas si Jumao-as sa pagbotar sa nagsunod nga mga piniliay sa nasud.
Samtang adunay reklamante nga usa ka Daniel Miano ang mikuwestiyon sa kandidatura ni Villaber tungod sa non-residency kun wa magpuyo o wa makaabot sa gipangayo nga gidugayon sa iyang pagpuyo sa lungsod sa Cordova.
Si Jumao-as kandidato sa United Nationalist Alliance (UNA) samtang si Villaber ubos sa Lakas CMD/KBL.
Nipasabot si Beltran nga ila unang paabuton ang resolution gikan sa central office kabahin sa desisyon sa maong kaso.
“There’s possibility nga ma-delete sila (candidates) o ma-disqualify (sa pagpapili),” matod sa opisyal sa dihang nahinabi sa mga tigbalita.
Sa laing bahin, si incumbent Cordova Mayor Mary Therese Sitoy-Cho, magpasubli sa pagka-mayor ubos sa PDP Laban – One Cebu ug si Sherly Sefuesca, independent candidate, nagtinguha sab sa maong posisyon.
Pagka-bise mayor, mga kandidato naglangkob nila ni Lemuel Pogoy, Ximgil Dino Sitoy, Victor Tago III ug Paul Villaber.
Sa pagka-konsehal adunay 14 ka mga kandidato.
Kini naglakip nila ni: Nicandro Aguilar III, Cora Borromeo, Teodorico Casquejo Jr., Jonathan Gairanod, Wilson Lapinig, Jerome Lepite, Christopher Ligan, Cesario, Cesario Muñez, Cesar Suan, Samuel Sumagang, Allan Tiro, Rowena Tongco, Jose Wahing ug Roque Yburan. FVQ