GISUSI sa mining engineer sa Mines and Geosciences Bureau (MGB) VII ang bungtod sa barangay buhisan nga gikareport sa barangay official nga posibleng maghatag og hulga sa kapin 100 ka mga kinabuhi nga nagpuyo sa sityo Sandayong.
Kapin sa duha ka oras ang pagsaka ug pagkanaog sa mga barangay personnel, Cebu City Natural Resources Office ug kawani sa MGB aron masuta ang sitwasyon ibabaw bungtod diin unang natandog sa linog niadtong tuig 2013.
Si Engr. Anjay Love Geniston, Science Research Specialist sa MGB VII nagkanayon nga adunay 15 centimeters ang distansiya sa buka (liki) sa bukid apan iyang gihulagway nga hinayhinay na kining nabuni (gumikan sa gidugayon) ug gituboan na og mga sagbot.
Ang ubos nga bahin sa liki, humokon ang yuta ug matod pa sa mga tanod sa barangay nga unang nakabisita, aduna say liki sa yuta mugna gihapon sa linog lima na katuig ang nakalabay.
Niadtong Oktubre 22, ang MGB nihatag na og landslide threat advisory sa barangay official sa buhisan nga niawhag sa mga barangay residents sa pagmatngon hilabi na kon adunay uwan nga mahitabo sanglit dilikado nga adunay mga bato nga maligid gikan sa bukid.
“Residents along the footslope have to be relocated (long term solution) of at the very least , evacuated during rainy periods,” tipik sa rekomendasyon sa Geologist Josephine Aleta ug Joh Christopher Santos.
Si Kapitan Gremar Barete, niingon nga sila dunay duha ka lugar nga gitan-aw, sityo Dulhogan ug Tubod nga igo sa dul-an 40 ka pamilya. PAC