HUMAN sa presentasyon sa mga resulta sa pakisusi sa hinungdan sa landslide sa Barangay Tina-an, gimando ni Department of Environment and Natural Resources (DENR) Secretary Roy Cimatu ang pagsusi sa laing duha ka quarry operators nga nag-operate sa dakbayan sa Naga.
“Papupuntahin ko ang aking MGB to conduct also a test there because there might be a possibility na magtutulad rin nito. So, ‘yan ang pupuntahan nila as soon as possible,” mubo nga pahibawo sa kalihim atol sa ambush interview sa mga tigbalita, kinsa nagdali og pauli human sa dialogue tali sa landslide victims.
Si City of Naga Mayor Kristine Vanessa Chiong nitug-an nga siya ang nihangyo ni Cimatu nga ipa-assess sa MGB ang Quarry Ventures Philippines Inc. (QVPI) sa Barangay Tagjaguimit ug JLR Construction and Aggregates Inc. sa Barangay Cogon.
“I requested the DENR Secretary if ma-assess na kay wala naman na ma-suspend, further assessment just to err in the side of caution and safety,” sumala sa mayor.
Gitawgan sa Superbalita Cebu ang JLR kagahapon, apan way opisyal nga nitubag sa tawag.
Samtang, wala makontak ning mantalaan ang mga tinugyanan sa QPVI.
Ang maong duha ka quarry operators ang apil sa walo ka large-scale quarry ug 15 ka Industrial Sand and Gravel (ISAG) nga nag-operate sa Central Visayas nga gilibkas na ang suspension sa ulohang buhatan sa MGB ning buwan ug nakabalik sa operasyon, human natapos ang safety ug geohazard survey nga gipahigayon sa composite team sa mga geologist ug mining engineer sa maong buhatan.
Ang paglibkas sa suspension subject sa saad sa local government unit ug quarry ug ISAG operators nga motuman sa rekomendasyon sa composite technical team.
Si MGB Director Wilfredo Moncano ang mihatag og clearance sa paglibkas sa suspension. SCG