ANG Philippine Atmospheric, Geophysical and Astronomical Services Administration kon (Pagasa), ang nahimo ng parte sa kinabuhi sa tanan.
Kon magdag-om man lang, o way hunong nga pag-uwan sud sa pipila ka oras sa paghangin ug bisan na gani sa kainit sa panahon, adunay mga kalihukan o buot nga molawig, dali nato nga ipangutana, “Unsay bana-bana sa Pagasa sa panahon?”
Mapa-yanong tawo, mag-uuma, mangisdaay, negosyante, estudyante, opisyal sa gobyerno o si bisan kinsa gikan sa tanang hut-ong sa katilingban, kasagaran mag-atang sa balita sa panahon.
Dinhi sa Kabisay-an, halos tanan nakaila sa director sa Pagasa Visayas, Engr. Oscar Tabada, kinsa gikatakda na nga moretiro sugod karong Biyernes.
Si Tabada 38 ka tuig na nga nangalagad sa Pagasa naila na sa tanang lokal nga kagamhanan sa Visayas, human iya na kining nalukop sa pagduaw alang sa himuong mga pagpasabot sa kadaot nga dala kon ugaling adunay mga dagkong weather disturbance sama sa bagyong nga gilantawang moigo sa kabisay-an.
Mag-65 anyos na karong Sabado (Oktubre 28) ang usa sa mga garbo sa Sugbo, nga taga Barangay Tisa, dakbayan sa Sugbo.
Kahigayunan
Usa ka mechanical engineer ug nasudlan na ang halos tanang klase sa trabaho aron lang makahuman sa pagtungha, samtang nagpaabot nga ma-hire sa usa ka factory nga gi-applyan unta, nisuway siya sa pagkuha og pasulit isip trainee sa Pagasa niadtong 1978.
Enero 2, 1980 hingpit sya nahimong meteorologist sa edad nga 27, 10 ka tuig una siya na-assign sa Manila.
Niadtong 1990, nahimo siya nga senior officer sa Pagasa-Mactan, 2005 na hingpit nahimong chief sa mao nga buhatan.
Sa kapin 20 ka Pagasa weather station sa Kabisay-an siya nga gikan nangulo sa Mactan ang napiling mahimong director alang sa Pagasa sa rehiyon 6, 7, 8 ug sa Palawan area, sugod niadtong 2009.
Apan una niya nakab-ot ang taas nga posisyon, naagian usab niya ang mga pagtamay, mga dagkong hagit, ilabi na nga di saligan.
Gani, nakasinati pa siya nga di pamation sa mga opisyal sa gobyerno ug makwestyon sa pangu kaniadto sa Pagasa.
“Dakong challenge nako kay niadtong panahuna ang kritiko grabe kaayo makadaot namu sa Pagasa, kay ang Pagasa sauna wa gyud nailhi, tingali kay atong equipment, wa kaayo. So nitrabaho gyud ta, naningkamot, himu’g analysis, one time ang daku sa Pagasa, niari, nakita niya akong analysis map. Nakaingon siya ‘Sinong gumagawa nito? Sabihin mo, kailangan pa nya ng sampung sako ng asin para maging magaling siya’,” asoy niya.
Ang mao nga hitabo nahimo niyang labing dakong hagit nga mas nakatabang kaniya diha sa pagpaningkamot.