NAHAN-AY na ang mga mokandidato sa umaabot nga 2019 mid-term election gikan sa magsangka nga mga partido ug mga independente sa pagka-senador, kongresista hangtud sa lokal nga mga opisyal, mayor ug mga sakop sa konseho.
Ang unang distrito sa dakbayan sa Davao gibantayan sa daghang katawhan tali sa kampo sa mga Nograles ug Duterte apan ang kahinam sa katawhan kalit nga miawop tungod walay Nograles nga nakig-atbang kang Paulo “Pulong” Duterte kon dili, mga dili inila nga pangalan ang misumite sa ilang certificate of candidacy (COC) sa buhatan sa Commission on Elections (Comelec).
Nganong walay Nograles nga mikandidato?
Nakatambong ko sa kanhi Christmas party sa kampo sa mga Nograles nga gitambongan sa mga sakop sa Media sa dakbayan sa Davao diin ang amahan mismo nga si kanhi Speaker Prospero Nograles ang namulong nga “Peace na ang Nograles ug Duterte sa natad sa politika sa dakbayan sa Davao.” Dili na kuno sila makig-atbang sa mga kandidato sa Duterte sa lokal nga mga puwesto.
Karon ang mga anak na nga Nograles ang aktibo sa politika apan ila gihapong gipadayon ang pagtamod sa pulong nga giluwatan sa ilang amahan.
Human na ang tulo ka termino ni Kongresista Karlo Nograles samtang magpasubli nga magpapili isip partylist representative sa PBA si Jericho Jonas Nograles nga nailhan sa kadaghanan nga si Koko Nograles.
Nahimong lig-on nga balwarte sa mga Nograles ang 1st District sa dakbayan sa Davao tungod kay natagamtam sa katawhan ang tinud-anay nga serbisyo alang kanila.
Dili hulga kang Pulong sa iyang pagpapili nga kongresista ang iyang mga kaatbang. Mas menus ang gasto kon itandi sa dunay lig-on nga kaatbang apan mas hayahay ang kahimtang ni Sid Ungab kay walay miatbang kaniya sa 3rd District.
Gibag-o sa magsuong Sid ug Abet ang dagway sa 3rd District ubos sa ilang termino sa Kongreso. Ang kanhi lapok nga mga dalan padulong sa tumoy sa kabukiran ilang gipasemento ug ang mga mangitngit nga dapit ilang gipasugaan pinaagi sa solar power.
Ang katawhan sa kabukiran malingaw na pagtan-aw sa mga programa sa television ug dili na sila ulahi sa mga balita ug sa kalamboan.
Sa political career ni Mayor Inday Sara Duterte-Carpio iyang napanunod ang pagserbisyo sa katawhan nga gibilin sa iyang amahan nga si Presidente Rodrigo Duterte apil na ang iyang suki nga kalaban sa eleksiyon nga si Magdaleno Marcellones.
Seguro na sab nga gikan gihapon sa pamilya sa Duterte ang sunod nga bise mayor kay walay kalaban si Sebastian “Baste” Duterte.
Malauman nga mahimong malinawon ang dakbayan sa Davao sa umaabot nga eleksiyon apan magpabilin nga gawasnon ang katawhan sa ilang pagpili sa ilang opisyal gawas sa walay kapilian.