BISAN tuod kon duna nay mga bugas sa merkado nga mikunhod ang presyo, apan moabot pa og pila ka adlaw una mabatyagan sa mga konsumante ang ubos nga suggested retail price (SRP) niini.
Ang pag-ubos sa presyo sa bugas resulta sa pagsugod na sa mga ani sa kahumayan ning panahona.
Nasayran nga gisibog ang hingpit nga pagpatuman sa SRP sa bugas sa mga merkado niadtong Martes human nga mihangyo ang mga retailers og igong panahon aron nga makaandam sa ilang awtlet ug mga timaan alang sa maong katuyoan.
Ang kausaban gilaumang mahitabo sa Sabado, Oktubre 27, kon diin ang nagkadaiyang bugas limitahan na lang ngadto sa upat ka mga presyo.
Kini mao ang regular-milled ug well-milled rice nga ibaligya og di motaas sa P39 ug P44 matag kilo, sa maong han-ay, samtang ang “imported” nga matang limitahan ngadto sa well-milled ug premium rice ug presyohan og di motaas sa P39 ug P43 matag kilo, sa maong han-ay.
Di sama sa presyo sa unang semana sa Oktubre nga ang retail price alang sa usa ka kilo nga regular-milled ug well-milled rice naa sa P45.87 ug P49, sa maong han-ay. Kini gumikan kay ang SRP mas ubos ang presyo.
Ang mosupak nga negusyante ug retailers kinsa mobaligya og sobra 10-porsiyento nga gitugot sa SRPs mag-atubang og pagkabilanggo og lima hangtud 15 ka tuig ug magmulta hangtud P1 milyon, base sa Price Act of 1992.
Unta magpadayon ang pag-ubos sa presyo sa mga bugas sa palengke aron nga makubsan sab ang kabalaka sa katawhan sa pagsaka sa presyo sa batakang palaliton ning mga panahona.