MADRID, SPAIN - Sama sa ubang European cities, malakaw ra nimo ang mga nabantog nga tourist spots ug atraksyon sa Madrid.
Gawas niini, di ka mahutdan og mga adtuanan, buhatonon ug mga tan-awonon sa capital city sa Spain.
Naa na tanan sa Madrid ang mga sikat nga tourist spots, shopping centers, bars, clubs, restaurants ug uban pa.
Gani, daghan na ka og maadtuan, masinati og makan-an sa imong pagsuroy-suroy sa usa ka adlaw.
Apan dakong hagit sa mga turista ang bagang duot sa tawo ining mga atraksyon sugod udto hangtod sa hapon.
Sa unang tulo ka mga adlaw sa pagbisita sa Superbalita Cebu sa dakbayan, gilakaw ning tigsuwat ang mga atraksyon nga duol sa hostel niini sa may Tirso de Molina.
Kon sayo sa buntag, mas maayo nga suwayan nimo og pamahaw sa nabantog nga Chocolatería San Ginés nga nailhan sa ilang hot chocolate with churros sa may Puerta del Sol.
Mas maayo kon mosayo ka sa chocolateria aron di ka molinya og taas aron lang nga makatilaw niini.
Ang maong chocolateria maoy usa sa angay nimong kan-an sa Madrid sanglit nagsugod kini og dalit sa ilang chocolate with churros niadto pang 1894 ug kini di palabyon sa mga politiko, artista ug mga prominenteng tawo kon mobisita sa dapit.
Sa Puerta del Sol, gawas sa ilang City Hall, imo sab makit-an ang sikat nga building sa Tio Pepe nga maoy suki sa mga salida di lang sa Hollywood apan sa tibuok kalibutan.
Kon mahuman na ka og pamahaw, pwede ka mosuroy sa Plaza Mayor, apan wa pa kini tawo sa buntag sanglit mangabli man kini inig ka udto hangtod gabii.
Imong maagian ang Plaza Mayor kon mopaingon ka dagsaon nga Palacio Real de Madrid tapad sa usa sa mga pinakadako ug nindot nga Catedral de la Almudena.
Mas maayo nga sayo sab ka sa buntag mobisita sa Palacio Real de Madrid tungod kay wa kini kaayo mga turista gikan alas 8 hangtod alas 10 sa buntag.
Human sa Palacio Real, mahimo na kang mobalik sa Sol paingon sa Gran Via aron mag-window shopping.
Sa may Gran Via nimo makit-an ang mga nagkadaiyang botique stores, malls, shopping centers ug uban pa.
Sa paniudto or panihapon, mahimo mong mokaon sa Plaza Mayor o sikat nga food market sa Madrid nga mao ang Mercado de San Miguel.
Mas mahal ang mga pagkaon sud sa Plaza Mayor og kon mokaon mo didto, mas maayong menu of the day inyong pilion kaysa ala carte.
Sa laing bahin, matilawan sab nimo ang mga lamian ug authentic Spanish foods sa Mercado de San Miguel sa mas barato nga presyo.
Di nimo angay palabyon ang ilang paella nga dako og kalahian sa atuang paella, mga hamon, olives with cheese, croquita, ug wine o tinto de Verano (summer wine) ug uban pa.
Ang mga pagkaon sa San Miguel naggikan sa one euro pataas ang presyo.
Sa gabii, mahimo ka mobalik sa Gran Via, mangita og bar kilid sa dan, maglakawlakaw hangtod imong makit-an ang mga sikat nga building sa Metropolis, Scheppes, hangtod maabot ka sa Palacio de Cibeles diin mahimo kang mag-chill sanglit adunay mga bar ug kan-anan duol dinhi.
Pwede sad nimo adtuon ang gay-friendly neighborhood sa Madrid nga mao ang Chueca sa mga bars ug restaurants.
Kini ang mga insider tips sa Superbalita Cebu kon masaag ka sa Madrid tungod sa imong pagkalaagan:
1. Pangita og kapuy-an duol sa Centro. Mas maayo nga ang imong hotel o hostel duol sa Centro ilabi na ang duol sa Puerta del Sol, Gran Via, Chueca, Tirso de Molina, Plaza Mayor ug uban pa tungod kay anaa ra dinhi duol ang mga atraksyon nga pwede nimong mabisita.
2. Research. Kon do-it-yourself (DIY) ang imong paglaaglaag, mas maayo nga mag-research naka daan sa imong mga buot buhaton ug adtuon aron di mausik nimo ang oras. Paghimo og checklist aron di ka maglibog. Ug kon magkuha ka og tour, mas maayo apan medyo gasto sab ang tour. Daghan ang mokuha og morning biking tour sa Madrid.
3. Pagsayo. Mas maayo nga kon molaag ka sa mga tourist spots, adtuon nimo ni og sayo sa buntag kon di ka kinahanglan mosulod sa building ug mobayad sa entrance fee. Kini tungod kay kung maudtuhan o mahapunan ka, i-expect nalang nga anaa sa lima ka mga tawo pataas imong mga photobomber sa picture. Grabeng ang pagdagsa sa mga turista sa mga tourist spots sa Madrid.
4. Pag-amping. Bantayi ang imong mga gamit matag kanunay. Mas maayo nga anti-theft bag-o bag nga mabutang nimo sa imong atubangan imong gamiton aron di ka makuotan ilabi na kung mosud kas bagang duot sa mga tawo.