Usa sa mga labing gihisgutan sa National Basketball Association (NBA) free agency mao ang pagbalhin ni All-Star guard Damian Lillard sa lain nga team.
Gipadayag na ni Lillard ang iyang intensiyon nga biyaan ang Portland Trail Blazers, ang team nga mipili kaniya isip 6th overall pick niadtong 2012.
Prangka ang 33-anyos nga gusto niya ngadto sa Miami ug nipadayag pud og interes ang Heat sa iyang pagbalhin sa East side.
Apan daw miparat ang transaksyon kalabot sa Trail Blazers ug Heat.
Matod pa sa taho gikan kang NBA insider Chris Haynes nga nasagmuyo ang Heat sa dagan sa ilang negosasyon.
“Obviously, Miami doesn’t have all the assets that Portland would want in a return for a Damian Lillard trade,” ni Haynes. “So they want to know, Ok, what do we have to get out there. What other teams do we have to get involved to make this work and so far the communication is just not there. That’s making this situation rather frustrating on that side for Miami.”
Nangandoy ang Heat nga mabingwit na si Lillard kay basin mao kini ang kuwang nga piyesa alang sa ilang pangandoy nga kampyonato.
Naabot sa NBA Finals ang Heat sa miaging season human nila gipakuratan ang Boston Celtics sa East championship, apan wa magsilbi ang init sa Heat batok sa kakalma ni Nikolo Jokic, Jamal Murray ug Denver Nuggets.
Kon makuha sa Heat si Lillard, hayan makatabang kini kang Jimmy Butler ug Bam Adebayo.
Sa miaging season nag-average si Lillard og 32.2 points, 4.8 ka rebounds ug 7.3 ka assists. Bisan paman sa iyang individual scoring, wa maalsa ni Lillard ang Trail Blazers kay igo lang kini mipwesto sa ika-13 sa Western Conference dala ang 33-49 nga baraha.
Si Lillard nahimong NBA All-Star ka pito sa iyang career ug siya pud ang NBA Rookie of the Year niadtong 2013.