PATAY ang usa ka lalaki human nga giluba sa wala maila nga suspetsado sa flyover sa Purok 6 Barangay Puerto ning siyudad sa Cagayan de Oro.
Ang biktima naila nga mao si John April General, 21, adunay kaipon ug residente sa Purok 2, Barangay Puerto ning siyudad.
Sa nahipos nga impormasiyon gikan sa kapolisan sa Police Station 6 (PS6) sa Puerto gikabutyag nga samtang anaa si General sa maong dapit ug naglingaw-lingaw, gidunggab kini sa wala maila nga suspetsado.
Daling gidala sa Puerto Community Hospital ang biktima apan gideklara kining dead on arrival sa nag-atiman niini nga doktor nga si Dr. Kam Lloyd, gumikan na usab sa daghan nga dugo nga nawala niini.
Giingong nakaangkon si General og duha ka mga samad dinunggaban hinungdan na usab nga miresulta kini sa hinanaling kamatayon.
Wala pa usab masuta ang motibo sa maong krimen ilabi na nga nakasibat ang mihimo sa maong pagpangdunggab.
Sa pagkakaron padayon pa nga gawasnon ang responsable sa maong krimen nga gikamatay sa biktima.