MAGSAULOG sa iyang ika 79 nga kasumaran sa adlawng natawhan si Ricardo Cardinal Vidal karong adlawa Pebrero 6. Daghang kalihukan ang ipahigayon agi’g pahaom sa selebrasyon.

Usa na niini mao ang Santos nga Misa sa alas 11 sa buntag didto sa Cebu Mteropolitan Cathedral.

Click here for stories and updates on the Sinulog 2010 Festival.

Ning maong okasyon tugoti ako Cardinal nga magpasalamat kanimo sa imong way kaluya nga pagserbisyo sa katawhan sa Sugbo. Ang akong pamilya ug kaliwat nag-ampo nga lugwayan pa ang imong pagpuyo dinhi sa kalibutan kay nakasiguro kami, nga bisan kong di na ka Cardinal daghan pa gihapon ka og mahimo para sa Sugbo.

Di ikaglimod nga sa kadaghan sa tahas nga gisangon diha kanimo daghang higayon sab nga mipalyar ang imong lawas nga miresulta sa pagka landig nimo sa tambalanan sa daghang higayon. Gawas sa problema sa panglawas kay tawo ra lagi ang Cardinal duna sa’y mga higayon nga ang imong baruganan gisupak sab sa uban. Ang nakanindot lang sa Cardinal kay di “pikon” o di dali masuko. Sa laktod bisan kon tagsa ra kaayo ko maka-interview niya, maisip nako nga usa siya sa maayo ug credible nga news source.

NAHINUMDOM

Ang di nako makalimtan nga kasinatian uban sa Cardinal mao kadtong unang Misa de Gallo diin siya maoy celebrant didto sa lungsod sa Alcantara pipila na ka tuig ang nakalabay. Akoy gisugo pag-cover mao nga miadto ko sa maong lungsod usa ka adlaw sa wa pa ang misa sa Cardinal. Pag-abot nako anang hapon, nakakita ko og daghang pulis sa palibot sa simbahan ug kombento. Nasayran nako nga gipailawom diay sa ilang hepe nga si Insp. Alberto Abing ang lungsod ubos sa red alert status.

Ang iyang rason kay mobisita ang Cardinal busa di siya mokompyansa. Ang security plan nga bantayan ang palibot sa kombento ug simbahan, unya dunay duha ka nakasibilyan nga pulis ang mosimba og adto molingkod atubangan sa altar.

Pasabot ni Insp. Abing nako nga isip pinaka dakong haligi sa Simbahang Katoliko dinhi sa nasod di mahimong isalikway ang posibilidad nga dunay mga tawo nga magka-

Iinteres pagpasipala sa Cardinal.

Iyang gihimong sanglitanan kadtong insidente niadtong lungsod pa ang Talisay City diin nasugamak ang Cardinal og pagpangulata samtang nga nagpahigayon og misa atol gihapon sa Misa de Gallo. Labihan nako nga nakadayeg sa gihimo ni Insp. Abing kay samtang kompyansa ra kaayo ang kapulisan sa ubang lungsod nga duawon sa Cardinal, di siya gustong mokompyansa.

Tuod man malampuson nga napahigayon sa Cardinal ang Santos nga Misa.

LILOAN

Duna koy ihangyo sa DSWS sa munisipyo sa Liloan labot sa problema ni Gina Pinaapol nga gipadangat diri kanako. Si Gina miasoy nga 11 ka bulan na ang nakalabay, gidala sa Cainta, Rizal ang iyang manghod nga si Amor sa usa ka kaila aron mosud pagka katabang. . Gikan niadto hangtod karon wa pa makatilaw og sueldo si Amor.

Ang rason kay nagbilig utang ang tawo nga nagdala niya didto.

Kay minor de edad pa man diay ning dalagitaha, maghangyo ko sa taga DSWS sa Lilo-an, sa pag-ayuda ni Gina nga makabalik sa ilaha sa Gingoog City si Amor.

Nahibalo ko nga mahimo kaayo nga makapangayo og ayuda ang DSWS Liloan sa Dsws sa Cainta aron makapauli si Amor. Si Gina akong giawhag pagduaw sa buhatan sa DSWS karong Lunes.