SA ADLAWNG Sabado, Oktubre 27, ang maanyag nga kandidata nga lumad nga taga Magsaysay, Misamis Oriental nga mao si Danna Rose Socauco ang makigtigi sa 39 ka mga kandidata gikan sa nagkalain-laing probinsya sa nasod sa Pilipinas.
Kini human ipahigayon ang Grand Coronation Day sa New Frontier Theater sa kaulohan ug kini live sab nga makita sa programa sa Eat Bulaga sa GMA 7.
Simple lamang ang panawagan ni Danna Rose dihang nainterbyu kini sa Sun.Star SuperBalita niaging mga bulan nga unta padayon siya nga suportahan sa katawhan hilabina sa taga Misamis Oriental nga unta paspasan ang pagtext aron makasulod kanunay top 20, top 10 ngadto top 5.
Sa pagboto itext lang ang VOTE HU11 ug i-send sa 8933 alang niadtong Smart ug Sun users lamang.
Nag-unang adbokasya ni Danna Rose mao ang pag protehir sa natural nga puloy-anan sa mga pawikan human nakadayeg kini kaayo dihang gisaysay niini nga iyang nakita sa iyang duha ka mga mata ang pagpanganak niini didto mismo sa ilang lungsod sa Magsaysay.
Hilig usab kini mag-adventure o mag travel mao nga nangandoy nga unta mahimong usa ka flight attendant.
“Like all FAs, I would like to see the world with my own two eyes. Traveling has always been part of my life’s itinerary and the best shoes to fill to be able to travel the world is to become an FA,” iyang pahayag dihang naglakip sab kini sa Miss Earth Philippines kaniadto.
Kalipay sab niini nga unta mapresentar ang probinsya sa Misamis Oriental gumikan kay iyang nakita nga daghang patsada nga lugar ang iyang probinsya nga angayan suyoron, ug ipanghambog sa tibouk kalibutan.