SA nagsugod pa ko sa trabaho sa pagpanibya baniog na kaayo ang pangalan nga Oscar Tabada. Kong nakabantay halos tanang newscast nga isibya sa radyo ug telebisyon naa gyud kanunay ang report nga mabati gikan sa Philippine Atmospheric, Geophysical and Astronomical Services Administration kun Pag-asa.
Daghan nang newsroom ang akong nasudlan hangtod nga nahimo ko nga news director sa usa ka sibyaanan, ang buhatan sa Pag-asa di magpauwahi kong presentasyon sa balita ang hisgutan.
Ang buot ipasabot ang weather forecast sa Pag-asa magsilbi nga importanting bahin sa matag newscast may bagyo man o wala. Sa ato pa di kompleto ang usa ka newscast kong way update sa lakat sa panahon.
Sa tanang mga ahensiya sa gobyerno bugtong ang Pag-asa ra ang di hibintahaan ang exposure sa panerbisyo kay ang ilang mga forecaster nagtingog live sa halos tanang AM station og telebisyon. Og usa na diha si Engr. Oscar Tabada nga suki kaayo sa newsroom ilabi na kong may nagdanga danga nga bagyo.
Akong personal nga kasinatian uban ni Engr. Tabada makaholuganon ug makasaysayanon. Usa ka higayon tungod sa grabing baha nga nasinati ang akong live report sa TV nanukad sa Guadalupe River sa dakbayan sa Sugbo.
Tungod kay nakarga na sa akong assignment ang maong sapa nisuway ko og tawag ni Engr. Tabada kong mahimo ba nga moadto siya sa akong nahimutangan aron ma-interview live.
Sa way pagduha duha iyang gisanong akong hangyo ug sa unang higayon nag interview ko niya live taliwala sa nagpungasi nga bul-og sa tubig sa maong sapa. Nakaingon ko kong parehas pa lang ni Egr. Tabada ka maabiabihon ang mga opisyal sa gobyerno mas nindot nga panerbisyo. Di ra to mao kay sa dihang nasinati ang dagkong bawod sa Barangay Dumlog sa ciudad sa Talisay ako na sab siya nga gitawgan kong mahimo ba nga mainterview. Way daghang langas niabot siya. Puwerte hinuon nakong ulawa kay samtang nag-interview ang dagkong bawod sa among luyo didto nihagsa sa among nahimutangan. Si Engr. Tabada pewerting basaa.
Imbes mopadayag og negatibong sentemento, ang patented niyang pahiyom maoy nisugat sa akong panan-aw dayong ingon nga ang nahitabo kabahin gihapon sa serbisyo publiko. Karon nga nanamilit na siya sa Pag-asa human sa 38 ka tuig nga panerbisyo naglaum ko nga magpadayon gihapon siya sa paghatag kanato og uwahing kaugmaran sa lakat sa panahon. Kong nagtrabaho pa ko ron sa newsroom akong isugyot nga tagaan siya og slot isip news presentor nga motutuk sa lakat sa panahon. Ma TV man o ma radyo.
Apil na gani ang social media nga maoy akong gosugyot niadtong nagtabi mi unom ka bulan na ang nakalabay. Ang iyang segment mahimong tawgon nga On Time with Oscar Tabada. Engr. welcome sa grupo sa mga retirees ug Happy Birthday!