NAWALA na ang paglaum sa University of Mindanao (UM) spikers human nilukapa batok sa defending champion University of Sto. Tomas (UST) Growling Tigers sa iskor 19-25, 16-25, 23-25, sa men's volleyball quarterfinals sa 23rd Philippine University Games (Unigames) sa Dumaguete City niadtong Oktubre 26.
Giangkon ni UM coach Jhonathan Exequiel Vanta nga bug-at gyud ang kontra.
"Dili jud makaya defending champion ang UST," atol sa pakighinabi sa Facebook interbyu.
Dugang niya nga naglisud sa uwahi ang UM.
"Kakulba seguro pero third quarter nakabawi na sila pero nabitin lang jud," dugang niya.
Sa group C eliminasyon, gipildi sa UM ang Negros Oriental State University (Norsu), 25-20, 25-18, 25-9, human gipayukbo ang Holy Angel University, 25-18, 25-16, 25-16, De La Salle University-D, 25-20, 15-25, 25-17, 16-25, 15-18 ug University of San Agustin-Iloilo, 25-23, 25-21, 25-15.
Sayo niini, gitagak sab sa Wildcats ang Adamson University sa upat ka sets.
Matud ni Vanta nga gihimo ang tanan sa tim luyo sa mubo nga preparasyon tungod final exam niadtong milupad na ang mga atleta.
"More than a week wala sila praktis before the tournament," matud ni Vanta.
Dugang niya nga ang iyang mga magduduwa na-eskawot sila sa Uaap ug Ncaa coaches human makita ang maayong dinulaan bisan pakyas sa "Manila standard of play".
Ang tim gilangkuban nila Romel Bughao, Jimmie-Lou Flores, Vergilio Saromines, Jr., Kris Steven Avila, Fred Lhormand Maghinay, Rex Paller, Jan Ashley Jacob, Keith Christian Sampinit, John Vincent Yson, Yancee Requillo, Edwin Pague I ug Charlon Geem Daan.