BATA pa lang gani si Sophia Alexis Rabor, gitudloan na kini sa iyang mga ginikanan ug mga apohan sa pagpaambit sa iyang mga grasya ngadto sa uban.
Panahon nga saulogon sa iyang pamilya ang iyang birthday, dili makalimtan niini ang pag-share og mga regalo ngadto sa iyang classmates.
Niadtong Septiyembre 29, 2018, sayo nga gisaulog ang ikalimang birthday ni Sophia sa usa ka pribadong pool sa siyudad sa Carcar.
Mga klasmeyt ug mga ginikanan ingon man mga higala ug kabanay ang nitambong sa birthday party nga gipasiugdahan sa inahan ni Sophia nga si Gwenith Jill Rabor.
Ang mga klasmeyt ni Sophia nakadawat og lunch bag ug ubang surprisa gikan sa birthday girl nga nag-ala little mermaid sa iyang party.
Sa mismong adlaw sa kasumaran sa adlaw nga natawhan sa bata niadtong Oktubre 1, 2018, laing selebrasyon ang nahitabo sa ilang eskwelahan ug panimalay.
Si Sophia nanghatag og candies, chocolates, brownies, ug bottled tea drinks ngadto sa iyang classmates sa Kinder 2 sa Mother Mary’s Children School sa Carcar.
Bisan sa ginagmay nga paagi, buot ni Jill nga makat-unan sa iyang anak ang pagkamanggihatagon.
“We are teaching her that she has to be a giver at her young age. Makat-on siya mo-share sa iyang nadawat nga blessings ngadto sa uban, sa iyang classmates,” sigon sa 29 anyos nga inahan sa bata.
Ang amahan ni Sophia nga si Ronald Jeddon Rabor, 29, nagtrabaho isip nars sa nasod sa Bahrain.
Sa birthday ni Sophia sa miaging tuig, nanghatag usab sila og souvenirs sa mga classmate niini.
Si Jill nisaysay nga bation og kalipay ang iyang anak kon makita niini nga gigamit sa iyang classmates ang iyang mga hinatag.
Plano ni Jill nga sa sunod nga mga selebrasyon sa birthday sa iyang anak kay magpahigayon sila og feeding program.
Sumala sa inahan nga gihimo nila kini aron ipabati ngadto sa bata kon unsa kini ka espesyal ngadto nila.
“Blessed kaayo mi to have Sophie. At her age, kasabot na siya sa mga nahitabo. I don’t need to explain to her everything,” matod ni Jill.
Sa 5th birthday ni Sophia, niduaw usab sila sa lubnganan ni anhing Msgr. Teofilo Camomot sa Daughters of St. Therese (DST) Mother House sa Barangay Valladolid, Carcar. SCG