USA ka 12-anyos nga lalake nga gituohang tagulilong nakasulod sa pre-departure area sa Mactan Cebu International Airport (MCIA) ug nakasakay pa gyud sa eroplano nga way boarding pass ug way ticket.

Nakahimo siya niini nga wa gyud masakpi sa mga tinugyanan sa airport.

Click here for stories and updates on the Sinulog 2010 Festival.

Hangtod karon naglibog pa ang mga tinugyanan sa tugpahanan kon giunsa paglusot sa bata nga unta estrikto man kaayo ang pagpatuman sa siguridad sa airport.

Matod nila nga tagulilong kuno ang menor de edad.

Matod sa usa ka kasaligang tinubdan nga niadtong Pebrero 2, si Jeff (tinuod ngan gipugngan kay menor), lumad nga taga Samar ug libud-suroy, nakasulod sa airport bisan kon wa siyay boarding pass ug ticket sa abyon.

Nagpaka-aron-ingnon si Jeff nga pasahero ug nisunod lang sa ubang mga pasahero.

Wa say nagduda niya kay maayo ang bayhon ug senina sa bata.

Nakalusot siya sa security ug inspeksiyon sa mga tinugyanan sa airport.

Nakasakay na siya sa Philippine Airlines flight PR 848 nga gikatakdang molupad sa kaulohan sa alas 9:30.

Didto na masakpi ang menor de edad sulod sa eroplano sa dihang duha ka mga pasahero ang ningreklamo batok kang Jeff nga milingkod sa ilang lingkuranan.

Ang unang pasahero nireklamo kang Jeff nga gilingkuran ang iyang lingkuranan.

Busa gipabalhin siya sa laing lingkuranan.

Apan adunay laing pasahero nga nireklamo usab.

Busa gisita siya sa stewardess ug gipangayuan og ticket ug boarding pass.

Wa makahatag si Jeff hinungdan nga gipakanaog siya sa abyon ug gidala sa Philippine Center for Aviation and Security (Pcas).

Gi-turnover ang bata sa Department of Social Welfare and Development (DSWD).

Ang Pcas nga gipangulohan ni Supt. Joselito Salido wa mohimo og report ngadto sa kadagkuan sa airport kabahin niini kay dakong insulto sa iyang unit, matod sa tinuboan. Ang Pcas maoy in-charge sa sa siguridad sa tugpahanan.(Bobby Nalzaro)