DAGHAN ang niingon nga nawani na ang kawsa nga pederalismo karong nagsugod na ang panahon sa politika human sa pagsang-at sa mga sertipiko de kandidatura kun COC o certificate of candidacy sa mga politiko.
Nahutdan na kuno og oras ang pederalismo kay ang mga politiko sa Kongreso ug Senado motutok na sa ilang kaugalingong mga kampanya.
Apan daw wa mawad-i sa paglaum ang mga diehard nga tigsuporta ni Presidente Rodrigo Duterte.
Wa ko magpasabot sa libo-an ka mga troll nga gipangpapas na sa Facebook o kining mga grupo nga nag-apas lang og posisyon sa kagamhanan.
Atong gipasabot mao kining grassroots movement nga Kilusang Pagbabago nga moabot na og 300,000 ka sakop sa tibuok Visayas.
Mao kini sila ang mokuot sa ilang kaugalingong bulsa aron lang makapakitag suporta matag anhi ni Presidente Duterte sa Sugbo o magpundok sama sa mahitabo karong adlawa diha sa Kapitolyo sa Sugbo.
Ipahigayon karong adlawa diha sa Capitol Social Hall ang Visayas-wide Congress sa Kilusang Pagbabago. Usa sa ilang hisgutan mao ang ilang suportahan sa mga kandidato alang sa pagka senador nga moduso sa pederalismo.
Inig hapon, nagtakda sila og rally aron isibya na kon si kinsa kining ilang suportahan.
Atong nasayran nga nag-una sa ilang listahan mao si SAP Bong Go, ang sinaligan ni Presidente Duterte. Kinsa pa man kaha ang ilang paluyohan?
Atong nasayran nga nagkasabot silang mo-limit lang sa walo ka mga ngalan gikan sa listahan nga gihisgutan ni Mayor Inday Sara. Apan lima lang ang unahon nilang anunsyo karong hapon.
Gipaabot nga moabot alang sa rally human sa Visayas congress mao silang Senador Cynthia Villar, Sec. Harry Roque, Cong. Zajid Mangudadato, ug representante ni SAP Bong Go.
Akong pangagpas nga kon molampos ang mga kandidato sa administrasyon karong umaabot nga Mayo 2019, makuha na nila ang mayorya sa Senado.
Sa Ubos Balay Balauranan, atong malantaw nga mayorya sab ang combined nga mga modaog nga gipaluyohan sa PDP-Laban ug Hugpong ng Pagbabago. Tungod niini, mas sayon na molusot ang pederalismo sa wala pa ang 2022.
Dino
Gipa-ila-ila ni kanhi kongresista ug karon kandidato alang sa pagka konsehal sa Syudad sa Sugbo nga si Tony Cuenco ang mga kandidato sa Barug Team Rama. Kon atong tan-awon, lig-on kaayo ang ilang grupo labi na sa mga konsehal.
Duna lang koy masulti nga basin dili sila makauyon. Kinahanglang mangandam sila nga mawagtangan og padrino diha ni Presidential Assistant for Visayas Mike Dino.
Nisaka gyud ang akong kilay dihang wala si Dino sa kiliran ni Mayor Inday Sara pagbisita niini sa miaging Lunes. Bantayan nato kon mo-estariray ba gihapon ang presidential assistant sa sunod bisita sa Sugbo ni Presidente Duterte. Abangan.
@anol_cebu sa Twitter