TENSYONADO ug naputos sa emosyon ang sud sala ni Regional Trial Court Judge Victor Teves, Branch 54 sa Lapu-Lapu City Hall of Justice, niadtong Biyernes sa hapon, Oktubre 26, 2018.
Kini samtang gidungog ang kasong parricide batok ni kanhi Bohol Provincial Board member Niño Rey Boniel nga maoy gitudlo nga niunay og patay sa iyang misis nga si Bien Unido, Bohol Mayor Gisela Boniel niadtong Hunyo 7, 2017.
Ang star witness nga si Riolito Boniel, first degree cousin ni PB Boniel, maoy mihatag sa iyang testimoniya sa witness stand, kinsa detalyadong misaysay sa nahitabo sa mga adlaw nga wa pa gipatay si Mayor Gisela.
Base sa pamahayag ni Riolito nga sukad niadtong Mayo 26, 2017, nagpunay og patawag ang kanhi Provincial Board member nila ni Riolito, laing state witness nga si Randel Lupas, Restituto Magoncia Jr., Wilfredo Hoylar, Allan delos Reyes og meeting.
Dunay higayon nga lakip nga ipatawag sab si Lobo Boniel aron sila itigom.
Paghulagway ni Riolito nga adunay higayon nga iyang madunggan si Niño Rey nga nakahisgot og pulong nga problema, apan wa siya masayod sa tibuok nga dagan sa pakig-istorya ngadto sa mga gihinganlan.
Saysay pa sa witness nga gikan sa Hunyo 4, 5 ug 6, 2017, nagbalik-balik sila sa Dive Camp Resort, Bien Unido sigun sa instruction ni Niño Rey ingon sa aduna silay gipa-abot.
Gikarga
Niadtong Hunyo 7, 2017 sa ala 1 sa kaadlawon, samtang nakatagpilaw si Riolito gipukaw siya sa akusado ug gimandoan: “Gaw, kanang pumpboat ibalhin na (gikan sa pantalan sa Dive Camp, dungan sa pagtudlo sa ngitngit nga bahin sa resort).”
Gibutyag ni Riolito nga samtang nagpaabot siya sa pumpboat, iyang nakita sila si Lupas ug delos Reyes nga nagdayong og butang nga giputos og puti nga habol nga gikarga sa inabangan nga pumpboat.
Nimando si Niño Rey nga mobiyahe sila sa isla sa Olango, sakop sa Lapu-Lapu City.
Sa dihang gipa-demonstrate ni Riolito ni Senior State Prosecutor Juan Pedro Navera sa DOJ human iyang nakita nga tawo ug si Mayor Gisela mao ang giputos nga buhi pa niadtong higayona, kini nagpangab-ot sa bukton sa iyang bana ug nangayo og pasaylo.
“Salbahis kang asawaha ka!,” asoy ni Riolito nga maoy banghag nga iyang nadungog ni Niño Rey nga nagkumot sa buhok sa mayor dayon kablit sa gatilyo sa armas nga iyang gipunting sa ulo ngadto sa iyang asawa.
Gikuwestiyon sab ni Atty. Navera, ang akusado kay ingon sa nagkatawa nga nagsud-ong ni Riolito sa atubangan.
“I’m not laughing your, Honor,” abtik nga tubag ni Nino Rey Boniel.
Sa padayon nga asoy ni Riolito giputos og pukot ang lawas sa biktima nga gisudlan og dakong bato nga adunay gibug-aton nga 15 kilos ug laing bato diin gibaat ang pukot sa wa pa ihagbong sa kadagatan sa isla sa Caubian, islet nga sakop sa Olango, Lapu-Lapu.
Nimando si Niño Rey nga magpahatod sa Barangay Punta Engaño, Lapu-Lapu City. FVQ