GAWAS sa mga senador sa minoriya, bisan si Senador Grace Poe ang kuryuso usab masayod sa sunodsunod nga pagpamatay nga nahitabo dinhi sa Sugbo nga iyang nadunggan nga mahitabo halos matag adlaw.
Siya nitug-an nga karong Lunes, Oktubre 29, moduso siya og resolusyon nga manawagan alang sa paghimo og Senate inquiry sa maong mga kaso sa pagpamatay dinhi sa Sugbo.
Siya nisaad nga isip vice chairman sa committee on public order and dangerous drugs sa Senado, nga gipangulohan ni Senador Panfilo Lacson, aktibo siya nga moapil sa ipatawag unya nga hearing.
“Well of course, there are different sides to the story. We cannot blame these all on one particular reason. Some people maybe taking advantage on the war of drugs, but some maybe legitimately solve about that,” nagkanayon si Poe.
Sa gisang-at nga Senate Resolution 915, sila si Senate Minority Leader Franklin Drilon, Senators Leila de Lima, Francis Pangilinan, Risa Hontiveros, Paolo Benigno Aquino IV, ug Antonio Trillanes IV, nipadayag og kabalaka sa mga patay nga giingong kabahin sa kampanya sa gobiyerno batok sa gidili nga drugas.
Sukad Hunyo 1 hangtod sa Oktubre 24, 2018, di mominos 200 na ka mga tawo ang gipamatay dinhi sa Sugbo.
Sa 200 nga gipatay, 116 niini gipusil sa wa mailhing mga mamumuno nga kasagaran luwan og mga motorsiklo, samtang ang 50 namatay sa mga operasyon sa kapulisan batok sa gidili nga drugas.
Si Poe maoy testigo sa pinirmahay alang sa pagbanhaw sa panag-alyansa tali sa Nationalist People’s Coalition ug Barug Alang sa Kauswagan ug Demokrasya (Bakud) party niadtong Sabado, Oktubre 27, sa panimalay sa mga Durano sa dakbayan sa Sugbo.
Siya sinagop nga kandidato sa pagka presidente sa NPC sa miaging 2016 elections ug usa sa paluyohan nga kandidato sa pagka senador sa umaabot piniliay.
Siya nanghinaut nga patas ang gihimo nga mga imbestigasyon sa kapulisan sa maong mga krimen.
“So, sana hindi lamang yung mga maliliit na mga nahuhuli na mga mahihirap ang nakukulong, pati na seguro yung responsabli sa nagpasok ng P11 billion ng shabu sa ating mga ports,” dugang sa senador.
Iyang nakita nga ang kakuwang og mga korte ug mga piskal sa nasod ang hinungdan kon nganong maabtan og dekada ang paghusay sa mga kaso.
Kon masublian siya sa pwesto, gusto niya mahatagan og prayoridad ang katumanan sa Cebu Expressway ug ikatulong taytayan sa Sugbo aron masolusyonan ang kahuot sa dagan sa trapiko.
“It will help not only the locals but the economy as well. So, these will be my priorities to make sure the infrastructure in Cebu is completed,” dugang ni Poe, kinsa nagtuo nga pinaagi niini’ng mga proyektoha maghatag og dugang mga trabaho, mapalambo ang turismo ug ekonomiya sa Sugbo.