KONTROBERSYAL ug pyansadong anak ni Talisay City Mayor Socrates Fernandez nga si Joavan mag-atubang na usab og laing mga kaso.
Siya gireklamo sa pagpanion og pusil sa magtiayon nga nagsakay og motorsiklo nga naaksidente alas 3:45 kagahapon sa kaadlawon sa eskina Lawaan-1 ug Pooc, Talisay City.
Ang magtiayong Jonathan, 24, ug Irene Ignacio, 26, nagpuyo sa Inayagan, Naga City, namahayag nga samtang sakay sila sa Susuki motorcycle gikan sa ilang pinuy-anan subay sa hi-way sa Lawaan, habig sa right lane padung sa Cebu City, kalit ni overtake ang sakyanan ni Joavan nga Isuzu Big Horn kolor pula nga may plaka YEZ 460 nga nagsubay sa center lane.
Nikalit kini pagliko hinungdan nga maayong pagkapasok sa sakyanan sa magtiayon ug pulos sila nangalabay sa managlahi nga direksyon.
“Pagbangon namo, kalit siya’ng mikanaog sa iyang sakyanan ug gustong mokuha sa akong driver’s license ug miingon nga wala mo kaila nako,anak ko sa mayor (Soc) ug ako ni ang Talisay. Dayon iyang gikasa ang iyang pusil nga .45 (caliber) dayon tion nako.
Mao nga nidagan og kalit gakos akong asawa sa kakuyaw,” batbat ni Jonathan nga usa ka food attendant sa Mactan Air base Golf Course ning tigbalita.
“Akong gikalit paggakos akong bana ug akong gi-ingnan nga papa ayaw nalang sukol kay mangamatay ta ani,” saysay usab ni Irene nga empleyado sa Olympus, Mepz-2, Lapu-lapu, City.
Duha ka mga kaso batok kang Joavan ang gihan-ay sa Talisay Police station pinangulohan ni Supt. Henry Parnaso Biñas nga usa usab ka abogado.
Kini ang attempted homicide ug reckless imprudence resulting to damage to property resulting to physical injuries.
“Ako ning gitan-aw ang kaso kay matod sa alegasyon may armas si Joavan. Akong gipatawag ang mga responding policemen nga sila si PO2 Roelito Tano ug PO1 Manolito Daal,” butyag ni Biñas.
Si SPO4 Henry Obiso, hepe sa Traffic division nga nagbase sa Tabunok, niingon nga ila nang naduso sa Land Transportation Office (LTO) ang lisensya ni Joavan gumikan sa aksidente nga niresulta sa pagkabun-ong ug pagkasamad sa managtiayon ug kapakyas sa pagdala sa CR ug OR sa sakyanan ni Joavan.
Si Mayor Soc Fernandez, nga gikuhaan sa iyang habig sa mga tigbalita, namalibad sa pagtubag gumikan kay motambong sa santos nga misa, ug matod niya wa pa usab niya mahinabi si Joavan.
Ang kaatbang ni Soc pagka mayor sa Talisay nga si kanhi Board Member Raul Bacaltos nisaway sa insidente.
“Kon wala siya (Soc) kahibalo, unsaon pagdisiplina iyang usa ra ka anak. How much more ang gibag-ong lumulopyo sa dakbayan?
Motambag lang ko niya ipa rehab iyang anak kay mao usab kini ang panawagan ni Kongresista Eduardo Gullas kaniadto,” matod ni Bacaltos. (DQG-correspondent)