ISIP usa sa mga kalihukan sa naghinangat nga kapistahan sa Patron St. Catherine of Alexandria, sa makausa pa, ang syudad sa Carcar milusad na usab sa tinuig nga 9th Mayor Nice Apura Cup basketball tournament kagahapon sa Raphael’s Sports Bar sa SM Seaside City kagahapon.
Sa unang higayon, ang mga nagpasiugda mopahigayon og inter-town 21-under category nga salmotan sa Barili, Argao, Consolacion ug Mandaue ug mosubay sa single round robin format.
“Wa ta mo imbitar og lungsod nga nasakop sa 1st Distict kay naa may umaabot nga Gullas Cup nga madungan-dungan usab ani,” matod sa sports committee chairman Victor Ian del Rosario.
Mitambong usab sa paglusad sa kalihukan si Carcar City Mayor Nice Apura uban sa ilang mga sports officials nga sila si Diomedes Campugan, Hon Julie Flores nga nagrepresentar sa Barili, Celedonio Abayata Jr., Candice Unique S Acuña, Redcel Rentuma, Hon. Lucky Sphere Varga.
Ang torneyo sugdan sa Nobiyembre 4 sa Carcar City Sports Complex.
Ang makampiyon sa torneyo makabulsa sa ganting salapi nga P50,000, samtang makadawat og P30,000, P20,000, ug P10,000 ang makasakmit sa ikaduha, ikatulo ug ikaupat nga dapit. (JBM)