NATAPOS na paglimod ni Bureau of Customs (BOC) chief Isidro Lapeña, human namatud-an nga aduna gyo'y sulod nga droga ang upat ka magnetic lifter nga kanunay niyang gilimod nga wala.
Sa ngadto-ngari nga istorya, kinsa kaha ang dakong mamsa nga nagpaluyo niining dakong shabu shipment gikan sa nasud Malaysia nga sa kwentada mokabat kun kulang ngadto sa P11.4 billion ang kantidad nga nakalusot o gipalusot ubos sa iyang pagdumala sa BOC?
Makabaton kita'g pagduda tungod kay daan na siyang gipindutan sa iyang mga sakop nga dunay dakong shipment sa droga ug nagpositibo pinaagi sa tinugyanan sa x-ray machine, apan di gyod siya motuo.
Naghimo-himo pa siya’g istorya nga dunay grupo nga nag-finance og P20 million aron lang daw dauton ang iyang kredibilidad ug di gyod siya mo-resayn kay hugot kaayo ang pagsalig kaniya ni Pangulong Rodrigo Duterte.
Karon nga nabulgar na ang iyang pagpamakak, mibaliktad ang tono sa iyang sinultihan nga posible daw nga dunay droga, pero human na ang pagduda sa mga tawo nga iya kining gidepensahan, ug unsay katarungan? Siya ra mismo maoy bugtong nasayud.
Karon gibalhin siya sa Technical Education and Skills Development Authority (Tesda), sa inyong pagtuo, unsa man kini promosyon o demosyon?
Kung maminaw ta sa mga tsismis, daw pa 'konsuwelo de bobo' kining puwesto nga gibalhinan sa atong amigo nga taga Davao City. Iya nalang gyod untang giampingan ang dakong pagsalig sa atong halangdong presidente nga dili masubli ang nahitabo kang kanhi BOC commissioner Nicanor Faeldon.
Usa lang ka punto ang atong nagustohan sa atong presidente, nga bisag suod pa niyang amigo ug taga Davao pa, basta makasala sa iyang administrasyon diha-diha iya dayong tangtangon.
Ang pinaka-importante diha sa atong pagpanerbisyo, ma-pribado man o mga public offices, di nato abusuhon kining kagawasan nga gigarantiya sa atong Batakang Balaod.
Ngari sa atong lindog, ang bisan unsa man nga isyu nga atong tukion, anaa kanunay ang atong pagrespito, ma-pribadong tawo ka man, o ma-public officials.