ANG nahitabo sa Boracay maisip nga dakong pagtulon-an sa tanang local government unit nga dunay mga baybayon, labi na kadtong dagsaan kanunay og mga turista.
Niadtong Biyernes, Oktubre 26, giablihan pag-usab ang Boracay human sa unom ka bulan nga paglimpiyo ug pagpanindot pag-usab niining sikat nga lugar.
Nabaniog ang Boracay sa iyang kaanindot sa tibuok kalibutan busa kanunay dagsangan og mga tawo gikan sa nagkalainlain dapit sa Pilipinas ug gawas sa nasod.
Ubos sa administrasiyon ni Duterte, nautingkay ang mga baho ug kahiwian sa Boracay nga maoy hinungdan sa pagkahugaw niini.
Sa bag-ong Boracay karon, daghan nang gipangdili nga kaniadto gawasnon nga gipangbuhat sa mga negosyanti ug sa ilang mga customer.
Gilimitahan na usab ang gidaghanon nga mga turista nga moduaw ug mogamit sa maong dapit.
Dunay nakagusto duna say wa mahimuot sa bag-ong patakaran nga gipatuman sa Boracay.
Apan kon atong aninawon ang tanang gipangdili, nagpunting baya alang sa kaayohan. Pananglit dili na pwede magdala og payong, higdaanan ug lingkoranan, dili na pud mahimo mag-party, mag-inom sa baybayon, dili pwede magdala og iro o iring, gidid-an na ang pagsugba ug pagluto, ug labaw sa tanan, pamultahon kadtong masakpan nga nagpataka og labay sa ilang hugaw ug basura.
Kining bag-ong patakaran sa Boracay dili nato makita sa halos tanang mga munisipyo o siyudad nga dunay mga beach.
Busa dili ta moreklamo nga hugaw ang palibot sa mga baybayon nga atong gikaligoan.
Didto sa Boracay, giwagtang na kining mga sewage gikan sa mga hotel nga gibuga ngadto sa dagat. Dinhi sa atong palibot, ang mga hugaw gikan sa kabalayan o balay patigayon duol sa baybayon makita nato sa dagat.
Duna bay tinguha kaha atong mga opisyal sa gobiyerno nga sundon ang patakaran sa Boracay?
Mas maayo tingali sugdan paglili sa City Hall ug sa Kapitolyo ang mga kabalayan ug mga dagkong edipisyo sa mga coastal area kon wala pa kini paglabay og hugaw sa dagat.
Hinay-hinayan sab nato pagpatuman ang mga kalagdaan nga gihimo sa Boracay. Dili pa ulahi ang tanan aron mapatunhay nato ang kalimpiyo sa dagat ug maprotihian ang panglawas sa katawhan. Lihok na!