ISRAEL G. YBANEZ
Mayupay, Quiot, Cebu
TAKSI ang gisakyan nilang Amboy, Rito ug Estot sa pagbisita nila sa ilang barkadang si Romy. Na-admit si Romy sa San Roque Hospital gahapon. Nalup-og siya sa salog nga nawad-ag panimuot. Maayo gani nga nakit-an siya sa magtiayong Al-Tina. Ug nadala si Romy sa San Roque Hospital.
May dalang gasa silang Amboy, Rito ug Estot sa ilang pagbisita sa ospital karong hapuna. Parehong mangga ug mansanas ang gidala nilang Rito ug Estot. Apan lahi ang gidala ni Amboy. Ang kinaham sa higala nilang si Romy.
“Nganong ‘pulang kabayo’ may gidala nimo, Boy?” sukna ni Rito ug Estot nga nagkatawa.
“Nalimot diay mo, Rits ug Estot, nga kini maoy paborito ni Romy?” ni Amboy.
Nakurat silang Amboy, Rito ug Estot nga nahiluna si Romy sa ‘Private Room.’ Sa ilang pagsulod sa lawak maoy ilang nakita nga adunay babaye nga naglingkod. Nahibulong ang mga barkada nga uyab ni Romy ilang nakita.
“Day Juliet. nahibawo diay ka sa nahitabo ni Romy?” suknang timbaya ni Estot.
“Gahapon. Mi-diretso ko sa balay ni Romeo gikan sa airport. Ug maoy gitaho ni Tina nga nadala si Romeo dinhi sa ospital,” saysay ni Juliet.
Gisugid ni Juliet nilang Amboy, Rito ug Estot nga gikan pa siya sa Qatar aron paghimo sa tinuig niyang bakasyon. Usa siya ka nars nga nag-alagad sa publikong ospital sa Qatar. Ug iyang gitug-an nga kasal nilang Romy maoy tumong sa pagbakayon niya karon.
“Pagbugkos diay sa talikala sa inyong gugma, Day Juliet, ang inyong plano karon. Pero unsaon nga ospital may nalandigan ni Romy,” gikan ni Amboy.
“Gahi mag ulo. Tambagan sa pag- undang na pag-inom, misiaw man hinuon,” ni Juliet.
Sa sityo Mayupay, suod nga barkada silang Amboy, Rito, Estot ug Romy. Natapos ni Romy ang kursong magtutudlo. Apan ang pagmaneho og taksi maoy gipiling panginabuhian niya. Matag ‘off duty’ ni Romy bisyo niya ang pagdimdim sa pulang kabayo sa Eljie & Nely’s Restaurant uban sa suod niyang barkada.
Ang sakit nga mitakboy kang Romy gitag-an nang daan ni Amboy. Sakit sa atay ug ulcer maoy sakit nga makuha sa pag-inom nga way kaon. Mao nga sa pagsud-ong ni Amboy sa masakiton niyang higala, nahandom niya ang ilang kagahapon.
“Rom, kaon usa inom,. aron kondisyon,” kanunay kining ipahimangno nila kang Romy kaniadto.
“Way pulang kabayo sa langit mga kabarkads, busa pahimuslan nato ang panahon samtang may kinabuhi pa,” kanunay sab nga itubag ni Romy kaniadto.
Mao nga nagpadayon ang ilang kalipay sa pagdimdim sa pulang kabayo hangtod sa pagtakboy sa sakit ni Romy. Dili nila kapugngan si Romy sa gusto. Alang kaniya maayo ang bisyong inom kay sa tsiks samtang magpaabot sa pagbalik sa uyab.
Nahingangha si Romy sa iyang nakita dihang naulian siya sa maayong panimuot. Nauwaw siya sa iyang gidangatan. Nakita niya ang maanyag niyang uyab.
“Nagtuman gyud ka, Romeo, sa imong gusto! Tan-awa unsay gidangatan nimo. Katumanan unta sa atong damgo akong giuli,” mahay ni Juliet.
“Sori Day! Wa may laing tambal sa kamingaw nimo. Ug way ‘pulang kabayo’ sa langit,”
“Sigi padayuna imong bisyo! Ug timan-i kini: wa say ‘Juliet’ sa langit!” ni Juliet..
Nahimut-okan si Romy sa iyang nadungog. Ug nakita niya nga misanag ang katahom ni Juliet nga dugay na niyang gikamingawan. (KATAPUSAN)