BOC. Ang Bureau of Customs (BOC) karon ipadumala na sa militar tungod sa grabe nga korapsyon nga maoy hinungdan sa pagsulod sa daghan kaayo nga ilegal nga drogas nga binilyun ka pesos ang kantidad. Kini gisulti ni Presidente Duterte atol sa usa ka bangkete-despedida ni kanhi DFA Sec. Alan Cayetano didto sa Davao city. Si Cayetano modagan pagka kongresista sa iyang distrito sa Taguig city.
Atong mahinumduman nga bag-o lang gipulihan si kanhi Customs Commissioner Isidro Lapeñ ni Marina Administrator Rey Leonardo Guerero ug si Lapeña gitudlo nga maoy modumala sa Tesda. Gani, nahimo nga pagya nga si Lapeña imbis nga pasakaan og sumbong o di ba tantangon sa serbisyo gipatiran na hinuon padung sa taas.
Mao sad ni nahitabo ni kanhi Customs Commisioner Nicanor Faeldon. Imbis nga tantangon sa serbisyo o di ba pasakaan og sumbong tungod sa pagsulod sa shabu nga balor P6.4 bilyunes sa iyang panahon apan gitudlo siya nga deputy sa NDRRMC ug karon mao na ang warden sa national penitentiary kon Bilibid.
Ang dako nga kontrobersya ni Lapeña mao ang pagsulod sa mga magnetic lifter nga gisudlan og 500 ka kilos nga shabu. Apan, matud pa sa PDEA nga mas daghan pa ang nakasulod nga shabu kay dunay ilang nakit-an nga mga magnetic lifters apan wala nay sulod nga shabu.
Midako ang isyu batok ni Lapeña dihang mitagawtaw si Customs Collector Atty. Lourdes Manggaoang nga di mahitabo nga dili mamatikdan sa x-ray machines sa customs ang mga sulod sa magnetic lifters tungod kay maayo nga klase kon mahalon ang mga x-ray machines sa customs. Basin og ngaduka ang operator sa x-ray machines mao nga wa ka klaro sa kargamento.
Pung pa ni Presidente nga kining iyang gimando nga ang armadong kusog sa atong nasud na ang modumala sa BOC duna ni kalabutan sa “lawless elements” nga naa sulod sa BOC. Ang tanan mga empleyado sa customs ibutang sa Presidente sa “floating status” apan ang mga sakop sa customs intelligence unit moreport sa Malacañang ug adto mag-opisina sa gym.
Dako og pagsalig si Presidente Duterte nga limpyo ang mga sundalo ug dili madala sa korapsyon mao nga maoy mopuli sa pagpadagan sa BOC. Gani, iyang gidepensahan si Lapeña nga walay isyu batok sa korapsyon apan nasuyop lang sa hugaw nga sistema sa maong burokasiya sama ni Faeldon.
Hinuon, miingon si Presidente Duterte nga dili tanan nga empleyado sa BOC mga korap kon kawatan. Basi sa atong kasinatian ang sistema sa palusot sa kontrabando sa BOC nahimo na nga panginabuhian di lang sa mga empleyado apan lakip na niini ang mga negosyante ug kadtong mga nagpaluyo sa palusot mao nga lisud na nga putlon kini nga sistema bisan si kinsa ang molingkod nga presidente.