NIABOT na og onse ka local government units sa lalawigan sa Sugbo ang nisaad og libreng sakay sugod sa Oktubre 31 sa udto alang sa mga pasahero nga mamauli sa mga adlaw sa mga kalag ug mga santos karong Nobiyembre 1 ug 2.
Si Jonathan Tumulak, terminal manager sa Cebu South Bus Terminal (CSBT), niingon ang mga LGU nga mopagamit sa ilang mga bus nga way plite sa mga pasahero naglakip sa mga lungsod sa San Fernando, Alegria, Barili, Oslob, Dumanjug, Ginatilan, Boljoon, Moalboal ug Daanbantayan ug mga siyudad sa Naga ug Carcar.
Matod niya, prayoridad nga pasakyon sa maong mga bus ang mga senior citizen, mabdos, persons with disabilities (PWD) ug kadtong dunay kuyog nga mga bata.
Kon duna pay bakanteng mga lingkuran, mahimo nang mopasakay og mga pasahero nga wa maapil sa mga prayoridad.
Si Tumulak niklaro nga ang mga pasahero lang nga nagpuyo sa nahisgutang mga LGU ang pasakyon sa mga bus.
“Usa ni ka paagi sa security plan. So, bawal sila mo-pick up ug mopakanaug og mga pasahero sa highway along sa biyahe. So, adto lang gyud mosakay ang mga pasahero sa terminal ug adto sab sila monaug sa munisipyo o city hall,” pasabot sa opisyal dihang nahinabi sa Superbalita Cebu kagahapon, Oktubre 29.
Ang paagi, palinyahon daan ang mga pasahero sud sa CSBT sa dili pa tawgon ang mga drayber sa bus nga anha magpaabot sa eskina sa V. Rama Avenue, siyudad sa Sugbo.
Matod ni Tumulak alas 12 sa udto magsugod na og estambay ang mga bus tungod kay nalantawan nila nga modagsa ang mga pasahero sa Oktubre 31 gikan sa ala 1 sa hapon hangtod sa alas 3 sa hapon.
Siya nibanabana nga moabot og 300,000 ang mga pasahero nga modagsa sa CSBT alang sa mga adlaw sa mga kalag ug mga santos.
Samtang, 100,000 ka mga pasahero ang gipanglantawan nga mohugop sa North Bus Terminal, dakbayan sa Mandaue nga mamauli sa amihanang Sugbo.
Sa NBT, magpaabot ang bus gikan sa kagamhanan sa lungsod sa Daanbantayan.
Siya nidugang nga moabot sa 2,000 ang sitting capacity sa CSBT ug kon molapas sa maong gidaghanon, dili una nila pasudlan og dugang mga pasahero ang terminal aron dili maghuot ug malikayan ang ilogay.
Si Alex Padin, pangu sa Carcar City Traffic Management Office, nga ipagamit sa ilang kagamhanan ang tulo ka mini bus ug usa ka coaster aron masakyan sa mga taga Carcar nga mamauli.
Sa Nobiyembre 4, ang Carcar mohatod og mga pasahero nga manukad gikan sa maong siyudad hangtod sa dakbayan sa Sugbo. Sila kuhaon sa ganghaan sa bag-ong city hall.
Alang sa seguridad sa sumasakay, ang Philippine Drug Enforcement Agency (PDEA) nihimo og kalit ngsa drug test kagahapon, Oktubre 29, sa mga drayber ug konduktor sa CSBT ug North Bus Terminal.
Samtang, Transportation Office (LTO) 7 nihimo og covenant signing tali sa Police Regional Office (PRO) 7, Bureau of Fire Protection, Cebu Province, Land Transportation Franchising and Regulatory Board, REAVO, Cebu Road Heroes, Robinson Galleria, Philippine National Red Cross, Mega Cebu ug Highway Patrol Group alang sa operasyon karong Nobiyembre 1 ug 2. (Dugang nila ni PAC, AYB, AZLG)