TALIABOT na ang adlaw sa mga Santos ug minatay. Seguradong daghan na kita'g plano alang sa long weekend.
Semester break sab sa tunghaan busa hatagan nato'g panahon ang mga bata nga magplano sa ilang buhaton sa pipila ka adlaw nga bakasyon.
Ang akong lalaki nga Grade 9 nag-uban sa iyang mga klasmeyt nga mangaligo sa Island Garden City of Samal. Iyang giipon ang tanang sobrang balon sa eskuwela aron maoy magamit sa ilang outing.
Silay nagplano kung asa mangadto, unsay balunon sa matag usa ug unsay buhaton didto.
Nindot kini nga pagbansay sa mga bata nga magkinaugalingon ug dili magsalig sa mga ginikanan sa tanang buhaton nila. Kaniadto, magsakit ang among ulo kay magsige'g away sa balay. Usahay pila ka adlaw nga dili mag-istorya kay nagyampungad sa internet ug sa ilang gadget.
Karon kay adventure ang tripping niya kauban ang iyang mga higala.
Siyempre isip mga ginikanan, atong responsibilidad nga hatagan ang kabataan ug pahimatngon ug ayuda sa tanan nilang buhaton.
Basta sulti namo nga bawal sigarilyo, away, sugal, alak ug druga (SASAD) nga maoy mitsa nga malihis ang mga bata. Kung puwede pa sa badyet, magplano ang tanang sakop sa pamilya nga mag-uban sa outing sama sa pag-adto sa simbahan, resorts, mangaon sa gawas ug bisan magpabugnaw lang sa malls.
Dili na baya mobalik ang mga tuig sa ilang pagkabata busa hatagan nato sila sa atong panahon ug pagmahal mintras anaa pa sila sa atong poder.
Sa laing bahin, bawal sab ang SASAD sa mga menteryo apil na diri ang pagdala og mahait nga hinagiban ug alingugngog nga sound system.
Sa karaang panahon, mingaw ug solemni ang pagsaulog sa mga Pinoy sa adlaw sa mga minatay apan karon mora'g nagpista ang sementeryo.
Puwedeng dili na magdala'g pagkaon ug ilimnon kay naay mapalit nga makaon. Anaay nag-videoke, nagsugal, nagsayaw ug nag-inom sa ibabaw sa lubnganan.
Ang uban didto pa matulog ilabi na kadtong na-hangover sa inom o walay masakyan sa kahugot sa trapiko. Dili mapugngan nga anaay mag-away ug magpinatyanay pa. Nanghinobra ang komersiyalismo sa mga pangilin sa atong nasud gikan sa mga pista sugod Enero hangtud sa Disyembre. Hasta ang mga seremonyas sa simbahan nahimong komersiyo na sab.
Hasta ang mga langyaw nahibulong sa paagi sa Pinoy sa pagsaulog sa adlaw sa mga minatay ug Pasko. Gani kita ra yata nga nasud nga nagsaulog sa pinakadugay nga Pasko sa kalibutan.
Maayo nga gipahigpitan kini sa kagamhanan ug unta atong hinumdoman ang hinungdan ug katuyuan sa kasaulogan sa adlaw sa patay.
Adlaw kini nga atong handumon ug ipanalangin ang mga mahal sa kinabuhi nga nipanaw na ug sa mga santos sa simbahan nga naghatag og ehemplo sa maayong pagkinabuhing Kristiyano.