SA asa nga mga rehiyon himuon ang pilot testing sa pagpangrehistro?
National Capital Region, Cavite-Laguna-Batangas-Quezon (Calabarzon) ug Cordillera Administrative Region (CAR).
Unsay makita sa Philippine national ID?
Ubos sa RA 11055, makita sa ID ang kumpletong pangalan, address, birthday, birthplace, sex, blood type ug citizenship. Samtang ang mobile number, marital status, ug email address kay optional. Sa biometrics data, makita ang hulagway, fingerprints, iris scan ug ubang identifiable features.
Kinsa ang mahimong irehistro sa PhilSys?
Gikan sa pagkatawo mahimo na nga iparehistro sa Philippine ID System diin basic nga mga impormasyon lang una ang kuhaon ug i-update kini hangtod magkadako ang edad niini.
Asa magparehistro?
Usa ka tuig human niepekto ang bag-ong balaod, kinahanglan matag molupyo o langyaw nga residente personal nga magparehistro sa rehiyonal o provincial offices sa PSA, Local Civil Registry Offices, Government Service Insurance System (GSIS), Social Security System (SSS), Philippine Health Insurance Corporation (Philhealth), Home Development Mutual Fund (HDMF), Commission on Elections (Comelec), Philippine Postal Corporation (PhilPost) ug ubang mga ahensiya sa kagamhanan ug government-owned and controlled corporations (GOCC) nga itudlo sa PSA.
Aduna bay bayad ang pagkuha sa national ID?
Sa unang registration, walay bayad. Apan kon mawala nimo ang national ID ug magkuha ka og bag-o, mahibaw-an kon pila’y bayranan sa ipagawas unya nga IRR.
Unsay ipresentar atol sa pagparehistro?
Ipresentar ang birth certificate. Kon way birth certificate, mahibaw-an sa IRR kon unsay laing ipakita aron marehistro.
Aduna ba kini expiration?
Wala. Ang imong ID number sa PhilSys mao na ang imong numero sa tibuok nimo nga kinabuhi ug dili kini pwede ibalhin o ipagamit sa laing tawo.
Unsaon pagrehistro sa mga molupyo nga naa sa lagyo ug hilit nga mga dapit?
Dunay ipahigayon nga espesyal nga registration alang nila nga susama sa pagpahigayon og mobile passports.
Unsay buhaton sa mga Pinoy nga tua sa ubang mga nasod?
Adto sila magparehistro sa mga embahada sa Pilipinas o Philippine Foreign Services nga itudlo sa Department of Foreign Affairs.
Aduna bay exempted sa pagkuha og national ID?
Dili mandatory ang pagkuha niini, apan kon wa kay national ID, dili ka makapahimus sa mga serbisyo nga ihatag sa gobiyerno. Maglisod sad ka paghimo og transaksyon sa mga ahensiya sa kagamhanan kay pangitaan ka niini.
Moabot sa 33 ka mga ahensiya sa gobiyerno ang ma-cover sa national ID. Unsa ning pipila sa mga ahensiya? Social Security System (SSS), Government Service Insurance System (GSIS), Philippine Health Insurance Corporation (Philhealth), Commission on Elections (Comelec), Philippine Postal Corporation (PhilPost), Professional Regulation Commission (PRC), Bureau of Internal Revenue (BIR) ug uban pa.
Unsay mga silot ubos sa RA 11055?
Ubos sa Section 18 sa maong balaod, ang pagbalhin sa Phil ID o PSN ngadto sa laing tawo kay dunay silot nga 6-10 ka tuig nga pagkapriso ug pamultahon gikan sa P3 milyones hangtod sa P5 milyones kon mamatud-an nga nakalapas niini.
Apil sa masilotan ang mga tawo nga mogamit sa personal data sa tag-iya sa national ID o mo-access sa PhilSys o mo-process sa data information nga way pagtugot gikan sa hintungdang ahensiya.
Ang malisyuso nga pagbutyag sa data o kasayuran sa mga opisyal, empleyado o mga ahente nga adunay kustodiya o responsibilidad sa pagmintinar sa PhilSys kay silotan og 10 ka tuig hangtod sa 15 ka tuig nga pagkabilanggo ug pamultahon og P5 milyones hangtod sa P10 milyones. Kon moresulta sa financial profit ang pagbutyag o pag-process sa mga impormasyon, ang mamatud-an nga sad-an kay doble ang bayran nga kantidad.
Samtang, kon mamatud-an nga nagpasagad ang mga opisyal, empleyado o ahente nga dunay kustodiya o responsibilidad sa pagdumala o pagmintinar sa PhilSys hinungdan nga na-access sa dili awtorisadong mga tawo, silotan kini gikan sa tulo ka tuig hangtod sa unom ka tuig nga pagkabilanggo ug pamultahon gikan sa P1 ka milyon hangtod sa P3 ka milyon. (SCG)