WALA mahulga si Bise Gob. Agnes Magpale sa pagpakig-panihapon ni Presidente Rodrigo Duterte sa mga kandidato sa One Cebu Party ug PDP-Laban sa siyudad sa Mandaue kagahapon.
Una niini, wala’y gi-endorso ang anak ni Duterte nga si Davao City Mayor Sarah Duterte-Carpio tali nilang Magpale ug Kong. Gwendolyn Garcia alang sa posisyon pagka-gobernador, dihang nianhi siya sa Sugbo sa miaging semana.
Matod ni Magpale, dili siya angayang mahulga sa posibleng pag-endorso ni Presidente Duterte sa iyang kaatbang o unsa man gani ang mahisgutan sa kaatbang nila, bisan kabahini man kini sa national candidates o o local nga mga kandidato.
Alang kaniya, importante nga mapadayon lang niya ang iyang pagpangampaniya ug dili usab siya magpadisturbo niini.
Iyang gipasabot wala siya magsalig og endorsement gikan sa presidente o ni bisan kinsa ni bisan kinsa.
“Dili lang ta ma-threaten. Padayon lang ta sa atong kampaniya,” ingon si Magpale.
Sa nasayran, pribado ang tigum ni Duterte uban ang mga lokal nga kandidato sa PDP-Laban.
Si Gob. Hilario Davide III, sa iyang bahin, nga maoy running mate ni Magpale, dili buot manginlabot sa panagtigum sa mga kandidato sa administrasyon.
Tataw alang sa gobernador kon asa siya nga partido sakop, bisan paman ug siya wala pay pormal nga gi-endorso niini.
Si Davide magpapili pagka-bise gobernador ubos sa Liberal party (LP) diin si Magpale maoy iyang gobernador.
Si Magpale sakop sa Barug Alang sa Kauswagan ug Demokrasiya o BAKUD Party nga dunay alyansa sa Nationalist Peoples Coalition o NPC. (AZLG)