PAGDALI, pagpundo na og daghang tubig samtang may oras pa.
Sugod karong gabii, mabalda ang supply sa tubig sa pipila ka konsumidor sa Metropolitan Cebu Water District (MCWD) tungod sa pag-ayo sa nadaut nga nag-unang linya sa tubig.
Makasinati og 12 ka oras nga walay agas sa tubig ang dakbayan sa Mandaue, Lapu-Lapu, pipila ka parte sa Cebu City ug ang Consolacion karong adlawa, Oktubre 31, sugod alas 8:00 sa gabii hangtod alas 5:00 sa kaadlawon ugma, Huwebes.
Mao kini ang gipahibawo sa Metropolitan Cebu Water District (MCWD) aron ayuhon ang buslot sa mga tubo niini sa Butuanon Bridge sa dakbayan sa Mandaue.
Lakip sa apektado ang mga mga konsumidor sa MCWD sa Consolacion, Mandaue City, Lapu-Lapu City lakip na sa lower Mabolo, M.J. Cuenco Ave., North Reclamation area, Pier area, Carreta, Lorega-San Miguel, Tejero, T. Padilla, parte sa Imus Ave., sa Cebu City.
Gitambagan ang mga apektado nga konsumidor sa dapit nga magpundo na kini og tubig bag-o pa man ang water interruption.
Sirhan usab sa motorista ang parte sa J. Rizal St. eskina UN Ave. sa Mandaue City (atubangan sa Pacific Mall) gikan alas 10 sa gabii., Oktubre 31, hangtod alas 5 sa kaadlawon, Nobiyembre. 1, alang sa repair works.
Ang nagkadaghang reklamo sa hinay nga agas ngadto sa wala’y agas sa duha ka mga dakbayan sugod pa niadtong Septiyembre mao ang usa sa rason nga sutaon sa MCWD ang posibleng buslotsa koneksyon niini. Duha ka buslot ang nakita sa tubo sa Butuanon Bridge sa Mandaue City sayo ning buwana.
Nakakuha og permit ang MCWD gikan sa Department of Public Works and Highways-7 ug sa Mandaue City Government kabahin sa pagsira sa dalan nga kawtan nila.
Adunay kutob Nobiyembre 12 usab ang MCWD aron ibalik ang gikawot sa dan. Gi-schedule ang pag-ayo sa holiday tungod kay menos ang demand sa tubig niining mga adlawa. Sirhan usab ang right turn slot sa Butuanon Bridge subay sa repair ug road restoration. (B)