Magtiayon nga drug pusher nadakpan didto sa siyudad sa Cotabato atol sa buy bust operation sa Philippine Drug Enforcement Agency (PDEA) sa Autonomous Region in Muslim Mindanao.
Mga dinakpan giila sa kapulisan nga sila Ruel Balilia, 45, ug ang asawa niini nga si Arbaya, 42, mga molupyo sa Mabini Street, barangay Bagua Street.
Sigun sa taho gikan Cotabato City Police Office, nasayran nga banda alas 4:00 sa kaadlawon, Pebrero 6, gironda sa PDEA-ARMM ug Cotabato PNP ang panimalay sa mga suspek nga dugay nang gibantayan sa otoridad.
Matud ni PDEA-ARMM Regional Director Brian Babang nga maoy nangulo sa operasyon, nga pipila ka adlaw na nilang gipanid-an ang ilegal nga kalihukan sa mga suspetsado.
Gidugang ni Babang, nga gitunol sa ilang police decoy ang marked money nga P1,000 ngadto sa mga suspek, ug bugti sa maong kantidad, gihatag sab sa magtiayon ang duha ka paketeng shabu ngadto sa asset sa PDEA.
Ang duha nga gibalhog na karon sa ilang detention cell gitakdang pasakaan og kaso gumikan sa paglapas sa Section 5 ug Section 11 sa Article 2 ubos sab sa Republic Act 9165 nga mao ang Comprehensive Dangerous Drug Act of 2002.
Giklaro ni Babang nga duna pa silay gisundan nga dakong grupo sa Autonomous Region in Muslim Mindanao, ilabi na sa Cotabato City nga nagpayuhot sa ginadiling druga. (Edgardo Fuerzas)