COTABATO CITY -- Padayon karon ang rescue operation sa hiniusang puwersa sa kapulisan ug militar sa gidagit nga Indian national didto sa probinsiya sa Maguindanao.
Sumala pa nga si Christian Arrora, 54, minyo, gidagit sa mga armadong grupo alas 8:45 sa gabii niadtong Miyerkules.
Si Arrora giingong maoy mipalit sa Everson Flywood Company sa Barangay Landasan, Parang.
Gibutyag ni Maguindanao Provincial Police Office Director Rudelio Jocson nga gisulod sa napulo ka armadong lalaki ang Everson Flywood Company ug gipanggapos ang mga sekyu ug gipang-dis-armahan.
Gisulod dayon sa mga armado ang gipuy-an sa Indian national ug pinugos siyang gidala ug gisakay sa usa ka bangkang de motor subay sa Ellana Bay paingon sa wala matino nga dapit.
Naabtan pa sa mga nagrespondeng pulis ang gipanggapos nga mga sekyu apan pakyas sila nga masundan ang mga kidnaper.
Dako ang pagtuo ni Parang Mayor Ibrahim Ibay nga ang midagit kang Arrora mao ra sab ang mikidnap sa laing Indian national nga si Mike Khemani nga tag-iya sa Sugni Superstore nga hangtud karon anaa pa sa mga kamot sa mga midagit kaniya.
Naningkamot na ang kapulisan ug militar aron nga maluwas ang biktima gikan sa iyang mga kidnaper. (Edgar Fuerzas)