USA ka lalaking wa kabayad sa iyang gi-inom sud sa usa ka imnanan gisikop sa mga sakop sa kapulisan sa dakbayan sa Tagum.

Ang dinakpan nailhan nga mao si Dave Rex Supiter, hamtung ang panuigon, molupyo sa Purok 3, New Anda, Barangay Mesaoy, lungsod sa New Corella, Davao del Norte.

Sa report gikan Tagum City Police Station nasayran nga alas 3:45 sa kaadlawon niadtong Sabado, gipasikop sa floor manager sa Sexy Star Night Club nga si Rolando Lebris si Supiter human wa kini kabayad sa iyang giinom nga nagbalor og P1,120.00 sulod sa maong balay imnanan nga nahimutang sa Pereyras Compound, Barangay West, sa maong siyudad.

Ang dinakpan temporaryong gitanggong sulod sa selda samtang gipaabot pa ang

pormal nga reklamo batok kaniya.

Samtang sa laing bahin, usa ka lalaking wanted sa kasong kawat ang nasikop sa mga sakop sa kapulisan sa dakbayan sa Tagum.

Ang dinakpan nailhan nga si Danny Canoy 31, molupyo sa Purok 3, Barangay New Katipunan, lungsod sa Sto. Tomas, Davao del Norte.

Sumala sa report nga alas 6:30 sa hapon niadtong Biyernes, nasikop ni SPO1 Cuay ang suspek pinasubay sa gahum sa warrant of arrest nga giisyu ni Judge Hilarion Clapiz sa Regional Trial Court 11th branch 3 sa lungsod sa Nabunturan tungod sa kasong Qualified Theft nga nakaduket sa criminal case number 6976.

Ang suspek gitanggong dayon sulod sa selda samtang nagpaabot sa sunod nga mando sa korte. (Marvin Pineda)