DEAR Tita Heart
Hello Tita! Ako si Darlene, taga Iligan City. Akong problema tita bahin sa akong bf nga gusto na makigminyo nako. Apil akong mama ganahan kayo sa akong uyab kay insakto ang trabaho. Tita dili ko ganahan magminyo sa pagkakaron kay gusto pako mag-enjoy sa akong pagkadalaga. Unsay akong isulti nila nga galaom man sila nga magminyo nako? Kanang dili ma-offend sila tita.
Darlene
*****
Hello Darlene
Dili man siguro ka nila mapugos kung dili paka ready. Sakto ka! E-enjoy sa imong pagkadalaga kay kung maminyo naka ug makaanak imong pokos naa na sa imong pamilya ug usahay ngani gakalimtan na ang kaugalingon. Hinuon depende raman sab na kung unsaon nimo pagdala sa kinabuhing minyo. Unta kung magminyo ka aduna pod kay trabaho kay lisod ang panahon karon kung usa lang kaninyo ang dunay pangita gawas hinuon kung sobra-sobra gyod ang sweldo sa imong mabana. Balik sa imong problema, pasabta lang imong uyab ug inahan ug ipasabot nga dili paka andam ug kung makahulat ang imong uyab kanimo andam nimo siya pakaslan sa umaabot nga panahon. Wala gyod dautan kung maayo ang pagkastorya ug pagpasabot kanila.
Tita Heart