USA ka sakop sa rebeldeng New People's Army (NPA) ang giingon nga namatay dihang ilang gikapinusilay ang militar sa alas 7:00 sa buntag Sabado didto sa New Visayas, Lupon, Davao Oriental.

Si Captain Emmanuel Garcia, Public Affairs Office chief sa 10th Infantry Division, nagbutyag sa Superbalita nga nahitabo ang pinusilay dihang miresponde ang mga sakop sa 28th Infantry Battalion sa impormasyon gikan sa mga molupyo sa maong lugar nga dunay mga armadong tawo nga ilang nakita sa maong barangay.

Sa pagresponde sa militar, suma ni Garcia, ilang gikasugat ang mga rebelde nga miresulta sa pipila ka minuto nga engkwentro.

Mga residente nagbutyag nga naalarma sila sa presensiya sa mga armado sanglit nahitabo kini human sa duha ka adlaw nga ilang nakita nga mibisita ang taas nga opisyal sa NPA sa ilang lugar.

Sa pagsulat ning balita, ang militar nakahipus og duha ka mga M16 armalite rifles ug usa ka shotgun samtang ang patay'ng lawas sa wala mailhing rebelde ang gidala sa mga sundalo sa lungsod aron ilhon ang iyang pagkatawo ug ipahiluna ang pagpalubong.

Si Major General Carlos Holganza, commander sa 10th Infantry Division, nagpasalamat sa mga molupyo sa maong dapit ug nagpadayag sab sa iyang pahasubo sa namatay nga rebelde.

"We are moved by the show of support and concern of our citizens in Davao oriental in curbing criminality and terrorism in their place. While we are on a positive note, we grieve over the death of another Filipino who was lured, deceived and exploited by the CPP-NPA-NDF into joining an organization known for its notoriety in killing innocent people and sabotaging our economy with their big time extortion activity," suma ni Holganza.

Ang engkwentro tali sa rebelde ug militar nahitabo halos tunga sa adlaw ang nakalabay human mibisita sa lungsod sa Banaybanay, Lupon ug Mati City si Bayan Muna Representative Satur Ocampo, kanhi opisyal sa CPP, suma sa militar. (AD)