DIGOS CITY -- Si Philippine Sports Commission (PSC) chairman William Ramirez, kinsa guest speaker sa PSC Children's Games opening sa Cor Jesu College niadtong Lunes, mipahingusgan ang importansiya sa paghatag og kalinaw alang sa mga bata.
Ang PSC chief nakig-istorya sa 300 ka mga bata nga mipartisipar gikan sa nagkadaiyang parokya sa maong dakbayan, kapin 100 nga mga ginikanan ug catechists sa CJC Gym, miingon, “Sa pagdula mapugos mo og ila-ila, makig-amigo. Kining dula-dula para sa mga bata, diri na magsugod ang peacemaking kay kung mag-edaran na maglisod na kay daghan nang mga pagtuo.”
Ang Unesco una nang miingon nga ang Children's Games, usa ka dakong Sports for Peace Program sa ahensiya nga moawhag sa mga bata gikan sa nagkalain-laing tribu, relihiyon, ug kultura nga dunay katungod moduwa base sa “United Nations Convention on the Rights of the Child.”
“Sports can lift the spirit of the community even in despair when kids are actively playing,” pahayag niya.
Kini nakita dihang ang PSC mihimo og “sports therapy” sa mga bata kinsa nadamay sa kagubot sa Marawi nga gihimo sa Iligan niadtong milabay nga tuig.
Ang national sports agency pinaagi Philippine Sports Institute, plano mohimo og Children's Games sa Marawi isip kabahin sa rehabilitasyon sa programa sa gobyerno.
Gipahinumdom sab ni Ramirez sa mga bata nga mahimong ehemplo sa paglimpyo diin giawhag nga sakto sa paglabay og basura kung asa sila moadto ug mahimong disiplinado.
Samtang si CJC president Brother Ellakim P. Sosmeña, SC, kinsa pormal mideklara sa pag-abli sa duwa, nagpasalamat sa PSC sa pakig-uban kanila sa maong kalihukan.
“Malipayon mi nga nahimong kabahin ining program sa PSC isip usa ka partner. Pasalamat sab si Mary Mediatrix Parish ug uban pang mga parish. Isa ka opportunity nga mo-share sa among resources alang ninyong kabataan,” ni Sosmeña.
Nagpasalamat sab si Commissioner Maxey sa tanan sa mga bata ug Ate ug Kuya volunteers sa ilang partisipasyon ug miawhag kanila nga maglingaw sa duwa ug makighigala.
Lakip sa mga giduwa mao ang sack race, ball-to-cheek relay, patintero, hula-hoop relay, halu-halo relay, kadang-kadang ug tug of peace. (PSC-PSI)