MIANI og dili masukod nga pagbatikos ang kalit nga pagbali ni kanhi Customs Commissioner Isidro Lapeña sa iyang kanhi gibarugan nga walay sulod nga shabu ang mga magnetic lifters nga nahanaw o gipalusot sa ilang buhatan nga nakit-an nga wala nay sulod didto sa Cavite niadtong bulan sa Agosto.
Gihugon-hugon nga mokabat sa P11 bilyones ang kantidad sa
ilegal nga druga nga kabahin sa mibaha sa tibuok nasud ug gibaligya sa ubos nga presyo.
Si Lapeña usa sa sinaligan ni President Rodrigo Duterte kay iyang gituohan nga usa ka ligdong sa pagserbisyo ug walay dukit sa kurapsiyon.
Gibutang ni Duterte sa buhatan sa Bureau of Custom nga usa sa mga ahensiya nga gigamhan ug gidumala sa mga kurap nga katawhan.
Gani man, bisan pa sa panahon ni Kristo giayran na sa katawhan ang mga nagalingkod sa buwisanan sa gobyerno tungod sa ilang pagkahinapi ug diha sila nailhan.
Si kanhi General Aaron Aquino nga gibutang ni Duterte sa buhatan sa Philippine Drug Enforcement Agency aron palig- unon ang kampanya kontra illegal drugs mibarog nga ipaimbestigahan ang mga nalambigit sa pagpalusot sa mga magnetic lifter nga gisulod sa container kay konbinsido nga dunay anomaliya nganong gipalusot sa mga taga Bureau of Customs.
Si Aquino nahimong usa sa mga kanhi sakop ni Lapeña sa iyang pagdumala sa kapulisan sa Region 11.
Pinakadako kini nga anomaliya sa kasaysayan nga naglambigit sa P11 bilyones nga kantidad sa druga. Makaingon ka ba nga gilamoy sa sistema sa kurapsiyon ang kaligdong ni Lapeña?
Kon ang mga nasinati sa kinabuhi sa kanhing General, dili sila makatuo nga iyang gikalimtan ang iyang kaligdong tungod sa suhol aron palutson ang shabu nga maoy modaut sa kaugmaon sa iyang isig ka Pilipino.
Nakaila ba kaha siya kinsa ang mga nagpaluyo sa maong transaksiyon nganong iya mang gisulayan nga tanggalon sa buhatan sa BOC ang mga nikontra kaniya nga buot palawman pa ang paimbestiga sa mga magnetic lifters kay nagatuo nga duna kini sulod nga shabu samtang naa pa gikustodiya sa BOC sa wa pa kini nakagawas sa ilang poder.
Tungod sa kaguliyang, nakahukom si Presidente Duterte nga ipailawom sa pagdumala sa kasundalohan ang maong buhatan tungod sa pagkuyanap sa “lawless violence.”
May paglaum pa ba kaha nga mausab ang katawhan sa maong buhatan?
Magpabilin pa ba sa ilang kaligdong ang pipila nga maayo nga naa taliwala sa dautan?