BISAN pa mang og nakanselar ang iyang training nga gikatakda unta didto sa Italy karong buwana, apan dako ang pagsalig sa Sugboanong Olympian marathoner nga si Mary Joy Tabal nga malangkat gihapon niya ang ikaunom nga sunodsunod nga titulo sa ika-42 nga edisyon sa Milo Marathon National Finals.
Gawas sa talagsaong nagkutay nga kampiyonato, malaumon si 29-anyos nga Tabal nga makapakita og maayong performance nga posibling motupong o mobuak sa iyang record sa maong lumba nga gikatakda karong Disyembre 9, didto sa Laoag City.
“To defend my title and, yes part of the goal is to break my Milo Marathon National Finals record. Hopefully I will be injury free,” matod ni Tabal sa dihang gikahinabi sa SunStar Cebu.
Ang record nga gustong buk-on ni Tabal kinsa gipaluyohan sa Motor Ace Racing Team mao ang nga 2:47:44 segundos nga iyang narehistro sa Ilo-ilo City finals niadtong 2016.
Gibutyag ni Tabal nga sa pagkakaron nagkaduol na sila sa pinakahugot ug pinakataas nila nga pagpahigayon sa training mga lima ka semana sa dili pa ang kompetisyon.
“All my training will be in Cebu. Right now I’m done with base and build phases. We’re going to do the training’s peak phase this week and next week,” ingon sa gold medalist sa niaging 29th Southeast Asian (Sea) Games.
Importanti alang kang Tabal ang kadaugan sa national finals karon sanglit ang palaran nga makalabni sa kampyonato niini otomatiko man kining maoy mo-represent sa nasod alang sa 2019 SEA Games diin ang Pilipinas maoy mo-host.
Una untang plano sa team ni Tabal mao nga moistar didto sa Tuscany, Italy og unom ka semana alang sa iyang training. Apan ang pagkadelatar sa visa maoy nakapadesider kanila nga ikanselar na lang ang biyahe.
“My team, Motor Ace Philippines, has promised to provide the necessary things I need even if I’m not training in abroad. I will just stay focus on the goal,” saysay ni Tabal. RSC